طالبانو په سرپل او پکتیا ولایتونو کې درې کسان په دورو ووهل

AP ۱۴۰۳ غبرگولی ۲۳

طالبانو د سرپل ولایت په بلخاب ولسوالۍ کې دوه کسان او د پکتیا په زرمت ولسوالۍ کې یو کس په عام محضر کې په دورو ووهل.
د طالبانو په واک کې سترې محکمې د یوې خبرپاڼې په خپرولو سره ویلي، چې په سرپل کې دغه دوه کسان د «لواطت» په تور په دورو وهل شوي دي.

د خبرپاڼې له مخې، د بلخاب ابتدایي محکمې یوه تورن ته د یوه کال تنفیذي بند او د ۲۱ دورو او بل تورن ته بیا د ۶ میاشتو تنفیذي بند او د ۳۱ دورو حکم صادرکړی و.
طالبانو نږدې لس ورځې مخکې هم په سرپل ولایت کې هم د ۱۴ ښځو په ګډون ۶۳ کسان د «لواطت، غلا او غیراخلاقي اړیکو» په تور په عام محضر کې په دورو ووهل.
د یو بل خبر له مخې، طالبانو د پکتیا ولایت په زرمت ولسوالۍ کې هم یو کس د اخلاقي فساد په تور په دورو وهلی دی.
د طالبانو ستره محکمه وایي، چې دغه تورن پر یوه کال تنفیذي بند او په ۳۶ دورو تعزیري سزا محکوم شوی دې
طالبانو پرون د کندهار په سپین بولدک ولسوالۍ کې هم ۱۲ تنو تورن کسان په عام محضر کې په دورو وهلي، چې د «غلا، زنا او لواطت» په تور نیول شوي وو.
سره له دې چې په عام محضر کې د سزا د حکم پلې کېدل له بشري حقونو سرغړونه بلل کیږي؛ خو طالبان وایي چې دوی په تورنو کسانو شرعي حکم عملي کوي.

نور خبرونه

رادیو