د طالبانو تر واک لاندې باختر اژانس خبر خپور کړی چې د دغې ډلې د هرات ولایت ځايي چارواکو هغه ۳۰ کورونه چې د هرات زلزله ځپلو ته جوړ شوي وو، ورسپارلي. تېر کال په هرات کې پرله پسې زلزلو د سر زیان تر څنګ په زرګونو کسان بې کوره کړي هم وو.
ويل کیږي، دغه کورونه له هیواده بهر په چین او ترکیه کې د مېشتو افغانانو په مالي مرسته جوړ شوي.
د طالبانو تر واک لاندې باختر اژانس تېره ورځ چهارشنبه د (غبرګولي ۲۳مه) په ایکس پاڼه لیکلي چې دغه ۳۰ کورونه په هرات ولایت کې له زلزله ځپلو سره د مرستې لپاره د هرات په زنده جان ولسوالۍ کې زلزله ځپلو ته سپارل شوي.
دا د زلزلې هغه زیانمن شوي خلک دي چې د ژمي سړې هوا شپې او ورځې یې په خیمو کې تېرې کړې.
د طالبانو تر واک لاندې باختر اژانس د هرات ولایت د اناردرې د خلکو سیمه ییزې شورا د یوه غړي غلام رباني خوشبخت له قوله ویلي، چې د دغو جوړو شویو کورونو پر هر کور پنځه لکه افغانۍ لګښت شوی.
هغه ویلي چې د کورونو تر څنګ له دغو زلزله ځپلو سره د مرستې په برخه کې د کور لوښي او نور د اړتیا وړ توکي هم وېشل شوي.
باختر اژانس د هرات لپاره د طالبانو د والي حیات الله مهاجر په حواله لیکلي، چې د کورونو جوړولو تر څنګ به په نږدې راتلوونکي کې د دوی د اوبو، روغتیایي مرکزونو او ښوونځیو ستونزې هم حل کړي.
خو په هرات کې د تېر ۱۴۰۲ کال د تلې په ۱۵مې پرله پسې زلزلو زرګونه هراتیان بې کوره کړي چې د مني او ژمي څه باندې پنځه میاشتې یې په سړه هوا، سیلۍ او واوره کې تر خیمو لاندې تېرې کړې دي.
په هرات ولایت کې له زلزله ځپلو سره د مرستې کمیسیون طالب چارواکو د ژمي په سر کې ویلي و، چې شاوخوا څلور زره کورونه د جوړیدو په حال کې دي چې ۹۰ سلنه چارې یې بشپړې شوې دي، خو د هرات زلزله ځپلي د طالبانو داسې خبرې نمایشي بولي او وايي چې د دوی زیاته برخه لا هم بې کوره دي.
د ملګرو ملتونو د شمېرو له مخې په هرات ولایت کې د ۱۴۰۲ کال د تلې میاشتې په ۱۵مه په پرله پسې زلزلو کې تر ۱۴۰۰ ډېر کسان مړه شوي او ۱۱ زره نور ټپیان شوي وو.
د دې ترڅنګ په دغو زلزلو کې څه باندې اته زره کورونه په بشپړه توګه ویجاړ او د ١٧ زره کورونو ځینې برخې ویجاړې شوې وې
