د المپیک نړیواله کمېټه وايي، د پاریس د ۲۰۲۴ کال په المپیک سیالیو کې به د طالبانو هیڅ یوه چارواکي ته د ګډون اجازه ور نه کړي. د دې کمېټې ویاند وویل، د پاریس المپیک سیالیو کې د افغانستان شپږ کسیزه ډله ګډون کوي، چې د جنسیت د برابرۍ له مخې درې ښځې او درې نارینه پکې شامل دي.
د المپیک د نړیوالې کمیټې ویاند مارک ادامز پرون خبري غونډه کې وویل: «د جنسیتي برابر ټیم جوړول افغانستان ته یو پیغام دی، چې د طالبانو رژیم کې سپورت او جېمونو ته ښځو او نجونو لاسرسی محدود شوی دی.
ښاغلي ادامز وویل چې د المپیک نړیوالې کمېټې د افغانستان د المپیک د ملي کمېټې رئیس په رسمیت پېژندلی او عمومي منشي یې اوس په جلاوطنۍ کې دی.
د المپیک د نړیوالې کمیټې ویاند وايي: "موږ د افغانستان د المپیک ملي کمیټې له رییس او عمومي منشي سره د دوی په جلاوطنۍ کې کار کړی او موږ په څرګنده وایو چې موږ له جنسیتي پلوه برابر ټیم غواړو."
مارک ادادز وویل: «په پاریس کې به د طالب چارواکو لپاره ځای نه وي. "د طالبانو د حکومت هیڅ رسمي استازی به د ۲۰۲۴ کال د المپیک په لوبو کې د ګډون کولو وړ نه وي."
دغې کمېټې په دې وروستیو کې ویلي چې په افغانستان کې د ښځو او نجونو پر ورزش د شته محدودیتونو د لیرې کولو لپاره د افغانستان د ملي کمېټې او د سپورت له چارواکو سره خبرې کوي.
په پام کې ده چې نارینه ورزشکاران په ورزش، لامبو او جودو کې برخه واخلي، په داسې حال کې چې افغان ورزشکارانې به په اتلاتیک منډه او سایکلینګ کې برخه واخلي.
