د اسراییلو پوځ ویلي، چې د شنبې په ورځ سهار مهال د رفح ښار په سویل کې د یوې چاودنې له امله د دغه هېواد اته پوځیان وژل شوي دي. بل خوا، په همدې ښار کې د اسراییلي ځواکونو په بریدونو کې لږ تر لږه ۱۹ فلسطینیان وژل شوي دي.
دا په داسې حال کې چې اسراییلي ځواکونو په سویلي ښار رفح او شاوخوا سیمو کې خپلو بریدونو ته دوام ورکړی او د غزې پر څو سیمو یې بریدونه کړي، چې لږترلږه ۱۹ فلسطینیان یې وژلي دي.
د پوځ په وینا، دغه سرتیري په رفح کې د حماس پر ضد د شپې له عملیاتو څخه بېرته خپلې اډې ته روان وو، چې چاودنه پرې شوې ده.
تر اوسه د اسراییلو پوځ یوازې د ۶۰۱ لوا د مرستیال وژل کېدل تایید کړي او د نورو وژل شویو په اړه یې جزیات نه دي ورکړي.
دا پېښه د جنورۍ له میاشتې راهیسې د اسراییلو پر پوځ تر ټولو خونړی برید بلل کېږي. د جنورۍ په میاشت کې د حماس د توغندیو برید او دوو ودانیو د نړېدو په پایله کې ۲۱ اسراییلي سرتیري وژل شوي وو.
په تیر اکټوبر میاشتې کې پر غزې د اسراييلي پوځ د ځمکنیو بریدونو له پیل راهیسې د دغه هېواد ۳۰۷ پوځیانو وژل شوي دي.
