د پوهنتون استاد رسول پارسي د طالبانو له بنده خوشې شو

د طالبانو سترې محکمې د شنبې په ورځ وویل، چې د لوی اختر په مناسبت یې په ټول افغانستان کې ۳۴۹ بندیان خوشي کړي دي.

دغې محکمې په یوې خبرپاڼه کې لیکلي، چې د ۲۷۰ نورو بندیانو د بند موده هم کمه شوې ده.

اعلامیه کاږي، چې دغه بندیان د طالبانو د مشر هبت الله اخندزاده په حکم له زندانونو خوشې شوي دي.

د رسول پارسي تور

یوې باوري سرچینې افغانستان انټرنشنل ته ویلي، چې د ۱۴۰۲ کال د لړم په اتمه، د طالبانو محکمې ښاغلی پارسي مقدساتو د توهین په تور په ۴ میاشتو بند او د نظام پر ضد د تبلیغاتو په تور په ۱۲ میاشتو بند محکوم کړی و.

د پوهنتون دغه استاد تېرکال د وري په میاشت کې د طالبانو د استخباراتو له خوا ونیول شو او د استخباراتو په توقیف خونه کې له څو میاشتني بند وروسته د پلچرخي زندان ته ولیږدول شو.

د بشري حقونو سازمانونو په وار وار د نوموړي د خلاصون غوښتنه کړې وه، خو طالبانو دغو غوښتنو ته مثبت ځواب نه و ورکړی.

طالبانو په تېرو درېیو کلونو کې ډېر شمېر خبریالان، د پوهنتون استادان، مظاهره کوونکې ښځې او د دغې ډلې د پالیسیو نور خلاص کسان نیولي دي.