افغان سیاستوال: ۱۰۰۰ ورځې کیږي د ټولنې نېمایي قشر «ښځې» له خپلو لومړنیو حقونو محرومې دي
د نجونو د ښوونځیو د بندېدو د۱۰۰۰ ورځو له پوره کېدو او د لوی اختر په را رسېدو سره هممهاله، یو شمېر افغان سیاستوالو په خپلو اختریزو پیغامونو کې ویلي، چې له زده کړو څخه د افغان نجونو بې برخلیکه کېدل د افغانستان لپاره نه جبرانېدونکی دی.
د ملي غورځنګ مشر عبدالرشید دوستم په خپل اختریز پیغام کې ویلي، سږکال لوی اختر په داسې حال کې رارسېږي، چې ۱۰۰۰ ورځې کیږي د هېواد نیمایي قشر (ښځې) له خپلو ټولو لومړنیو حقونو څخه محرومې دي.
دوستم دغه راز په خپل اېکس کې لیکلي، چې د طالبانو د بشري ضد همدې یوه اقدام د هېواد راتلونکی او د افغانستان د خلکو برخلیک له تباهۍ سره مخ کړی دی.
د ملي غورځنګ مشر زیاتوي، چې له درېو کلونو راهیسې افغانستان د داسې یوې ترهګرې ډلې په لاس کې دی، چې هیڅ یوه اسلامي او انساني اصولو ته ژمن نه دي.
له دې سره، د افغانستان د متحدې جبهې مشر او پخواني جنرال سمیع سادات هم په خپل اختریز پیغام کې د نجونو پروړاندې د ښوونځیو بندېدو ته په اشارې سره وویل، چې له ۱۰۰۰ ورځو راهیسې افغانې نجونې له زده کړو محرومې دي.
د نوموړي په خبره، له تېرو درېو کلونو راهیسې شاوخوا پنځه میلیونه افغانان کډوال شوي او زرګونه نور افغانان د طالبانو تر حاکمیت لاندې نظام کې شکنجه کیږي او د یادې ډلې تر ظلم لاندې دي.
په افغانستان کې چې د نجونو پر مخ د ښوونځیو او پوهنتونونو تړل کېدل د جنسیتي نابرابرۍ او تعلیمي فرصتونو ته د نه لاسرسي لامل شوی دی، له پراخو کورنیو او نړۍوالو غبرګونونو سره مخ شوی دی.
د ۱،۵ میلیونه نجونو لپاره د طالبانو له لوري دا سیسټماټیک محرومیت نه یوازې د دوی د زدهکړې له حق څخه ښکاره سرغړونه ده؛ بلکې د زرګونو نجونو د فرصتونو د کمېدو او د رواني روغتیا د خرابېدو لامل هم شوی دی.
له دې سره، طالبانو بیا د ښوونځیو او پوهنتونونو په تړلو همداراز ټینګار کړی او د درېو کلونو په تېرېدو سره یې د ښځو او نجونو د زده کړو په برخه کې خپل دریځ بدل کړی نه دی.
د یادولو ده، چې د پخواني ولسمشر اشرف غني لومړي مرستیال بیا په خپل اختریز پیغام کې ویلي، دا د افغانستان په تاریخ کې لومړی ځل دی چې د کعبه شریفه له ټاکل شوې نېټې سره برخلاف طالبان په هېواد کې اختر لمانځي.
ښاغلي صالح هم په خپل اېکس کې لیکلي: «د خوشحالی ځای دی، چې افغانان د نړۍ له مسلمانانو سره یو ځای له طالبانو څخه یوه ورځ مخکې اختر لمانځي.»
