د ملي مصالحې د عالي شورا پخوانی رییس وایي، چې افغانان د بېوزلۍ، وزګارۍ او د طبیعي پېښو له امله اغېزمن شوي او د نړۍوالو بشري مرستو ته اړتیا لري. عبدالله عبدالله د اختر په مناسبت پیغام کې ویلي، چې ډېر شمېر افغانان اوسمهال له سختو اقتصادي ننګونو سره لاس او ګرېوان دي.
نوموړي په خپل دغه پیغام کې دغه راز پر نړۍوالو مرستندویه ادارو غږ کړی څو په افغانستان کې اقتصادي ستونزو او ستونزمن بشري وضعیت ته په کتو سره له افغانانو سره خپلو مرستو او ملاتړ ته دوام ورکړي.
دا په داسې حال کې ده، چې څه موده مخکې د ملګرو ملتونو د بشري چارو د همغږۍ دفتر په یوه راپور کې ویلي وو، چې په افغانستان کې د ۹،۲ میلیونه ماشومانو په ګډون ۲۳،۷ میلیونه کسان بشري مرستو ته اړتیا لري.
د دغه دفتر د شمېرو له مخې، په افغانستان کې څه باندې ۱۲ میلیونه وګړي د خوراکي توکو له نه خوندیتوب سره مخ دي او ۴۸ سلنه وګړي یې د بېوزلۍ تر کرښې لاندې ژوند کوي.
عبدالله عبدالله په خپل اېکس کې د پیغام په یوې بله برخه کې لیکلي:"د افغانستان د ابادي او پرمختګ یوازینۍ لار په یووالي، ګډ کار کولو، د ټولو لپاره د زده کړو او د کار د مشروع حق په تامین کې نغښتې ده."
نوموړی پرته له دې چې د کومې ډلې نوم واخلي زیاتوي، چې د افغانستان خلک باید په ځيرتیا سره د ملي ګټو، ملي یووالي، قومي، مذهبي او فرهنګي تنوع ته په درناوي او د ټولو لپاره د سوله ییز ژوند د زمینې په برابرولو سره همغږي او یو موټی شي.
ښاغلی عبدالله دغه څرګندونې په داسې حال کې کوي، چې طالبانو له نږدې درېو کلونو راهیسې ملي ګټې، ملي یووالی، قومي، مذهبي او فرهنګي تنوع تر پښو لاندې کړی او خپل قوانین په جبري توګه پر افغانانو مني.
د نجونو د ښوونځیو د بندېدو د۱۰۰۰ ورځو له پوره کېدو او د لوی اختر په را رسېدو سره هممهاله حامد کرزي، عبدالله عبدالله او عبدالرشید دوستم او یو شمېر نورو افغان سیاستوالو په خپلو جلا جلا پیغامونو کې ویلي، چې د نجونو پروړاندې باید د ښوونځیو دروازې خلاصې شي.
طالبانو له درېیو کلونو راهیسې د ټولو افغان نجونو پروړاندې د ښوونیزو بنسټونو دروازې تړلي دي.
د ۱،۵ میلیونه نجونو لپاره د طالبانو له لوري دا سیسټماټیک محرومیت نه یوازې د دوی د زدهکړې له حق څخه ښکاره سرغړونه ده؛ بلکې د زرګونو نجونو د فرصتونو د کمېدو او د رواني روغتیا د خرابېدو لامل هم شوی دی.
له دې سره، طالبانو بیا د ښوونځیو او پوهنتونونو په تړلو همداراز ټینګار کړی او د درېو کلونو په تېرېدو سره یې د ښځو او نجونو د زده کړو په برخه کې خپل دریځ بدل کړی نه دی.
