ملا حسن اخند په اختریزه وینا کې د طالبانو له مخالفینو وغوښتل چې له مخالفته لاس واخلي
د طالبانو رییس الوزرا په ارګ کې د لوی اختر له لمانځه مخکې په یوه وینا کې د دغې ډلې له مخالفانو وغوښتل، چې له دوی سره له مخالفته لاس واخلي. ملا حسن اخند له سیاستوالو وغوښتل چې د "عمومي بخښنې" نه په کاخ اخیستو سره "له خپلو وروڼو" سره یو ځای شي او په سولیزی توګه ژوند وکړي.
د طالبانو د ارګ پر ایکس ټولنیزې شبکې خپور کړي پیغام کې ویلي، چې د اختر د لمانځه مراسم په کابل کې د طالبانو د رییس الوزرا ملا حسن اخند او د دغې ډلې د نورو چارواکو په شتون کې ترسه شوي.
په دغه پیغام کې ویل شوي، چې ملا حسن اخند په خپلې وینا کې له طالب چارواکو او جنګیالیو غوښتي، چې له خلکو سره د "درناوي او ادب" په اساس چلند وکړي.
ملا حسن اخند د هېواد له سوداګرو غوښتي، چې د اختر پر مهال له اړمنو کورنيو سره مرسته وکړي.
سره له دې چې ملا حسن خپلو مخالفینو ته د "عمومي بښنې" نه د ګټې اخیستو بلنه ورکوي، خو د نړۍوالو سازمانونو د راپورونو له مخې، طالبانو د واک تر نیولو وروسته خپلې ډیرې ژمنې نه دي پلي کړي او د عمومي بښنې له اعلان سربیره یې خپل مخالفین په ځانګړې توګه د افغان حکومت پخواني کارکوونکي په لویه کچه په نښه کړي دي.
په همدې حال کې پر افغانستان د طالبانو له بیا حاکمیدو نږدې درې کاله کیږي، خو دغه ډله لا هم کورنی مشروعیت نلري، ځکه چې کومې ټاکنې یې نه دي ترسره کړي او نړۍوالو لا هم د طالبانو حکومت په رسمیت نه دی پیژندلی. طالبانو، پر ښځو یې د پراخو بندیزونو په لګولو سره هغوی د ټولنې له بېلابېلو برخو څخه لرې کړي دي.
