راپورونه وايي، چې د ۲۰۲۴ کال له پیله د پاکستان په بېلابېلو صوبو کې شپږ خبریالان وژل شوي، چې وروستۍ پېښه کې د خیبرنیوز خبریال وسله والو په ډزو وواژه. ويل کیږي، په خیبر پښتونخوا کې یو شمېر خبریالانو ته نامعلومو کسانو پر ټیلیفون د مرګ ګواښونه هم کړي دي.
په پاکستان کې د خبریالانو د بنسټونو او خبریالانو د معلوماتو له مخې د ۲۰۲۴ میلادي کال له جنورۍ میاشتې تر جون پورې د دغه هیواد په پنجاب، سند، بلوچستان او خیبرپښتونخوا صوبه کې شپږ خبریالان د نا څرګندو وسله والو له لوري وژل شوي.
افغانستان انټرنشنل پښتو ته ځينو خبریالانو او د خبریالانو بنسټونو نن پنج شنبه د (غبرګولي ۳۱مه) ویلي چې، په بلوچستان کې محمد صدیق مینګل، پنجاب صوبه کې اشفاق سیال او جام صغیراحمد لار، سند صوبه کې نصرالله ګډاني او په خیبرپښتونخوا کې د شمالي وزیرستان کامران داوړ او د لنډي کوتل په وروستۍ پېښه کې د خیبرنیوز خبریال خلیل جبران ناڅرګندو وسله والو وژلي دي.
تر اوسه پورې د دغو وژل شویو خبریالانو د وژلو په اړه کومې وسله والې ډلې څه نه دي ويلي او نه هم د دوی د وژنو لامل معلوم دی.
په خیبرپښتونخوا کې خپلواک خبریال لال وزیر افغانستان انټرنشنل پښتو ته وويل، چې ناڅرګندو وسله والو ده ته هم د ټیلیفون له لارې ګواښونه کړي او ورته ویلي یې دي چې که خپل فعالیت ونه دروي نو وبه یې وژني.
د خیبرپښتونخوا په ملاکنډ ډویژن کې د زاهد ناصري په مستعار نوم بل خبریال هم وايي، چې وسله والو ورته ويلي چې له دندې لاس واخلي، که نه له بد برخلیک سره به مخ شي. «دوی دا خواست کوي چې تاسو له میډیا سره کار مه کوئ، بله خبره نه کوي.»
په پېښور کې د خیبرپښتونخوا لپاره د ژورنالستانو د ټولنې مشر ناصر حسین په دې وروستیو کې په دغې صوبه کې خبریالانو ته د ګواښونو او نا امنۍ خبره مني او وايي، چې دغه چاره که څه هم له پخوا روانه وه، خو په دې وروستیو کې یو ځل بیا د خيبرپښتونخوا په بېلابېلو سیمو کې د ناامنۍ په زیاتېدو ډیره شوې او خبریالانو ته ګواښونه کیږي.
هغه له حکومتي چارواکو وغوښتل چې په سیمه کې د خبریالانو امنیت ساتلو ته ځانګړې پاملرنه وکړي.
په خیبرپښتونخوا او نورو صوبو کې د پولیسو چارواکي د امن د ټینګښت خبره کوي خو له دې سره، سره په رڼا ورځ هدفي او مرموزې وژنې روانې دي.
وړمه ورځ د خیبرپښتونخوا په لنډي کوتل ولسوالۍ کې ناڅرګندو وسله والو د خیبرنیوز ټلویزیون خبریال او د لنډي کوتل پریس کلب پخوانی مشر خلیل جبران د اختر په رخصتیو کې د خپل کور مخته په ډزو وواژه، د لنډي کوتل پریس کلب خبریالانو د درېیو ورځو لپاره ویر اعلان کړی او له رسنیو یې غوښتي چې د ټوکو او موسیقۍ له خپرونو ډډه وکړي.
