چین او امریکا د هستوي خبرو پر سر پنځه کلن ځنډېدلی بهیر بیا له سره پیل کړ

د رویټرز د راپور له مخې چینايي استازو د خپلو امریکايي سیالانو د اندېښنو په ځواب کې ویلي، چې که د تایوان سره جګړه پیلېږي؛ نو له هستوي وسلو به کار نه اخېستل کېږي.
راپور وايي، امریکايي چارواکو اندېښنه لرله چې که چین د ټایوان سره په جګړه کې له ماتې سره مخامخ کېږي؛ نو ښايي چې له هستوي وسلو کار واخلي او یا د دغو وسلو په کارولو ګواښونه وکړي.
دا رنګه چینايي مرکچیانو امریکايي لوري ته ویلي، که د ټایوان سره د دوی جګړه پیلېږي؛ نو دوی کولای شي له هستوی وسلو پرته د شته وسلو په کارولو هم بریالیتوب ته ورسېږي.
دغه نیمه رسمي خبرې اترې د چین او امریکا تر منځ ترسره کېږي او په هغو کې به پوهان د خپلو دولتونو د دریځونو په اړه خبرې کوي، چې د «دویم بهیر» په نامه یادېږي.
په دې برخه کې د دواړو خواوو یا دوو دولتونو د چارواکو تر منځ رسمي خبرې «د لومړي بهیر» په نامه یادېږي.
د رویټرز د راپور له مخې، د «دویم بهیر» په دوه ورځنیو خبرو اترو کې شپږو پخوانیو امریکايي چارواکو او پوهانو د چین د شانګهای په ښار کې برخه لرله او د چین له‌خوا د هغه هېواد د ازادي غوښتونکي پوځ پخوانیو چارواکو ګډون کړی و.
رویټرز د امریکا د بهرنیو چارو وزارت د یوه ویاند له خولې لیکلي، چې دغه خبرې اترې کېدای شي «ګټورې» وي. که څه هم چې دغه وزارت په دغو خبرو کې ونډه نه لرله؛ خو په اړه یې مالومات درلودل.