په خیبر پښتونخوا کې د سړک غاړې په بمي چاودنه کې پنځه تنه پاکستاني سرتېري وژل شوي دي
چارواکي وايي، په خیبر پښتونخوا کې د سړک غاړې په بمي چاودنه کې چې د امنیتي ځواکونو د کتار د تېرېدو پر مهال وشوه، له امله یې پنځه پاکستاني سرتېري وژل شوي او دوه نور یې ټپیان دي.
دغه پېښه د جمعې په ورځ ناوخته ډیورند کرښې ته څېرمه په کورمې ولسوالۍ کې شوې، په دغه سیمه کې له څو کالو راهیسې د طالبانو پاخه سنګرونه جوړ شوي وو.
د پاکستان پوځ په یوې خبرپاڼه کې ویلي، د چاودنې په سیمه کې یې د پلټنې عملیات پيل کړي چې هلته شته «ترهګر له منځه یوسي او د دغې پېښې ترسره کوونکي د قانون منګولو ته وسپاري.»
تر دې مهاله هیچا او هیڅ کومې ډلې د دغې چاودنې پړه نه ده منلې؛ خو تر ډېره په ورته پېښو پاکستانی پوځ د دغو چاودنو د پړې ګوته ټيټيپي ډلې ته نیسي، چې د افغان طالبانو له ملاتړه برخمن دي.
له هغه مهاله چې طالبان په افغانستان کې واک ته رسېدلي، د پاکستان د طالبانو تحریک زیات شمېر غړي افغانستان ته تللي او له هغه ځایه په سیمه کې جګړهییز فعالیتونه تنظیموي او تر ډېره د پاکستان امنیتي ځواکونه په نښه کوي.
دا رنګه د جمعې په ورځ به یوې بلې پېښه کې بلوڅ بېلتون پالو ۱۰ تنه سېلانیان له بلوجستان صوبې څخه تښتولي او یو نا مالوم ځای ته یې لېږدولي دي.
پاکستاني چارواکو ویلي، د دغو تښتول شویو سېلانیانو د خلاصون لپاره یې هڅې روانې دي.
بلوڅ بېلتون پالې ډلې چې د دوه لسیزو را په دې خوا په سیمه کې وسلهوال فعالیت لري د دغو کسانو برمته کول یې منلي؛ خو په دې اړه یې زیات جزییات نه دي ورکړي.
