د طالبانو د صنعت او سوداګرۍ وزیر وایي، چې د صنعتي پارکونو قانون توشیح شوی او په نېږدې راتلونکي کې به د صنعتي پارکونو د ځمکو د وېش بهیر هم پیل شي. نورالدین عزیزي نن د یوې غونډې په ترڅ کې وویل، چې شاوخوا ۶۰۰ متقاضیانو له دې وزارته غوښتي، چې د هېواد په ټولو زونونو کې فابریکې جوړوي.
نوموړي د خصوصي سکتور د خبرو اترو، ننګونو او فرصتونو په غونډه کې زیاته کړه، چې دغه ډله د اقتصاد محوره پالیسیو په درلودو سره د خصوصي سکټور ملاتړ ته لومړیتوب ورکوي.
د ښاغلي عزیزي په خبره؛ دغه وزارت د هېواد د کانونو، زراعت، صنعت، رېل پټلۍ، انرژۍ او د سړک جوړونې په برخو کې د پانګونې د جلب و جذب لپاره زمینې برابروي.
نورالدین عزیزي زیاتوي، چې شاوخوا ۱۰۰۰ صنعتي شرکتونو تازه له صنعت او سوداګرۍ وزارت څخه جوازونه هم ترلاسه کړي دي.
نوموړي د نیمه کاره پروژه د بشپړولو، له نړۍوالو بانکونو سره د افغانستان د بانکي سیستم د عادي کولو، په نړۍوال سوداګریز سازمان کې د افغانستان د غړیتوب د فعاله کولو، پانګه والو او سوداګرو ته د ویزو د ترلاسه کولو د اسانه کولو او له کورنیو تولیداتو څخه د نړۍوالې ټولنې استفادې ته د زمینې د برابرولو ژمنه وکړه.
نوموړی دغه خبرې په داسې حال کې مطرح کوي، چې افغان صنعتکاران اوسمهال په هېواد کې د کافي برېښنا له نه شتوالی، د مالیاتو له زیاتوالي او دغه راز د کورنیو تولیداتو لپاره د مناسبو بازارونو له نشتون سره مخامخ دي.
د راپورونو له مخې، پر افغانستان د طالبانو له واکمنۍ مخکې په هېواد کې څه باندې ۵۰۰۰ فابریکې فعالې وې، چې ددې ډلې له واکمنۍ وروسته ډېر شمېر فابریکي د اقتصادي ستونزو له امله وتړل شوې.
