په بدخشان کې د طالبانو له طبيعي پېښو سره د مبارزې مشر محمد اکرم اکبري وايي، چې په دغه ولایت کې د ځمکې ښويېدنې او سېلابونو له کبله ۲ کسان مړه شوي او ۶ تنه نور ټپیان دي.
د نوموړي په خبره، دغه پېښه په یمګان ولسوالۍ کې شوې ده.
ښاغلي اکبري ویلي، په دې پېښه کې د استوګنې ۱۶ کورونه، يو ښوونځى او ۵ کيلومتره سړک هم ويجاړ شوی دی.
د طالبانو تر کنټرول لاندې ملي ټلویزیون تېره ورځ هم په اېکس پاڼه خبر ورکړی و، چې پرون سهار (د چنګاښ ۸مه) د بغلان په ګذرګاه نور او د بدخشان په شهدا ولسوالیو کې یو ځل بیا ویجاړوونکو سېلابونو خلکو ته درانه زیانونه اړولي دي؛ خو د تلفاتو په اړه یې څه نه و ویلي.
خو په بغلان ولایت کې بیا سیمهییزو سرچینو ویلي وو، چې په دغو سېلابونو کې درې ماشومان مړه شوي دي.
له بل پلوه دوه ورځې وړاندې د بامیان ولایت په یکاولنګ ولسوالۍ کې هم سېلابونو د دوو کورنیو ۷ غړي مړه کړي او لس نور تري تم شوي وو.
