په تهران کې یو شمېر مېشتو خبریالانو له افغانستان انټرنشنل - پښتو سره په خبرو کې وویل، چې په دغه هېواد کې د فرانسې سفارت له څو میاشتیني انتظار وروسته د ۱۳ خبریالانو د کډوالۍ وېزې رد کړې. دغه خبریالان له دوو کلونو راهیسې د فرانسې د وېزې د ترلاسه کولو لپاره په ایران کې مېشت وو.
یاد خبریالان د فرانسې سفارت د دې پرېکړې په اړه د اندېښنې په څرګندولو سره وايي، چې په ایران کې د دوی د اوسېدو موده پای ته رسېدلې او د ګواښونو له امله بېرته افغانستان ستانه کېدای هم نه شي.
د ملي ټلویزیون یوې پخوانۍ خبریالې د ځینو ستونزو له امله د خپل نوم د نه ښودلو په شرط وویل، چې یاد شمېر خبریالانو ته د تېرې اونۍ په وروستیو کې په یوه ورځ د وېزو د نه منل کېدو ايمیلونه راغلل.
نوموړې وایي، چې ۹ میاشتې مخکې یې په تهران کې د فرانسې سفارت سره انټرویو کړې وه؛ خو له ژمنو سره - سره یې د وېزو غوښتنه رد شوه.
یاده خبریاله وایي: "زمونږ کارونه د اس ان جې له خوا تعقبېدل خو دا اداره هم حیرانه ده، چې څنګه دوی ته رد ځواب ورکړل شوی دی."
یادې خبریالې د افغانستان انټرنشنل د خبریالې د پوښتنې په ځواب کې چې څنګه یې د وېزو غوښتنه رد شوې وویل: "تر اوسه دقیقه معلومه نه ده، خو ښایي په فرانسه کې ټاکنې د دوی د وېزو د ردېدو لامل شوی وي."
همدا راز د نیم رُخ اونیزې خبریال امین ارمان وایي، چې د وېزو غوښتنې ته یې له یوولسو میاشتو انتظار وروسته رد ځواب ورکړل شوی دی.
د نوموړي په خبره؛ له انټرویو وروسته په تهران کې د فرانسې سفارت دوی ته ویلی وو، چې له دوو تر څلورو میاشتو یې کارونه کیږي.
خو نوموړی زیاتوي، چې د وخت په تېرېدو سره د اس ان جې ادارې له دوی سره په خبرو کې ویلي وو، چې دا یوه اوږدمهاله پروسه ده او وخت نیسي.
ښاغلی ارمان همداراز وایي، چې په ایران کې د مېشتو افغان خبریالانو وضعیت ډېر کړکیچن دی.
د نوموړي په وینا: "په ایران کې د وېزو د تمدید امکان نه شته؛ نو ځکه یو شمېر خبریالان له ټولو امنیتي ستونزو سره سره مجبوره کیږي، چې د خپلو وېزو د تمدید لپاره افغانستان ته ستانه شي."
یاد خبریالان د رسنیو له ملاتړو ادارو غواړي، چې له ایران څخه یې نورو هېوادونو ته د انتقال په برخه کې همکاري وکړي.
د یاد شمېر خبریالانو د وېزو د ردېدو په اړه د افغانستان د خبریالانو ملاتړ سازمان وایي، چې له دغې موضوع اوس خبر شوي او د حل لارو په اړه یې له اړوندو سازمانونو سره د خبرو اترو هڅې کوي.
