د قزاقستان ولسمشر ویلي، چې بېلاروس د پنجشنبې په ورځ د چنګاښ په ۱۴ مه په استانه کې د شانګهای د همکارۍ سازمان غړی شو. قاسم جومارت توکایف وویل، بېلاروس په لنډ وخت کې د شانګهای د همکارۍ سازمان د غړیتوب لپاره ټول اړین ګامونه اخیستي دي.
د شانګهای د همکارۍ سازمان سرمشریزه د چهارشنبې په ورځ د (چنګاښ ۱۳مه) د قزاقستان په مرکز استانه ښار کې د دوو ورځو لپاره پیل شوه.
قزاقستان اوس مهال د شانګهای د همکارۍ سازمان دوره يي مشري په غاړه لري.
د روسیې د دولتي خبري اژانس ریانوستي د راپور له مخې، په استانه کې د شانګهای د همکارۍ سازمان سرمشریزه په دغه سازمان کې د بېلاروس د ګډون د سندونو په لاسلیکولو سره پیل شوه.
د روسیې د دولتي خبري اژانسونو د راپور له مخې، د شانګهای د همکارۍ سازمان سرمشریزه د «څو اړخیزو خبرو اترو پیاوړتیا او د سولې او دوامداره پرمختګ لپاره هڅې» په شعار سره ترسره شوه.
همدا راز د هېوادونو مشران به ۲۴ ګډ سندونه لاسلیک کړي.
افغانستان له ۲۰۱۲ کال راهیسې د شانګهای د همکارۍ سازمان څارونکی غړی دی، خو د طالبانو د واکمنۍ له پیل راهیسې هیچا ته اجازه نه ده ورکړل شوې چې د دغه سازمان په غونډو کې د افغانستان استازیتوب وکړي.
هند، ایران، قزاقستان، چین، قرغزستان، روسیه، تاجکستان، پاکستان، ازبکستان او بېلاروس د شانګهای د همکارۍ سازمان غړي دي. افغانستان او منګولیا څارونکي هېوادونه دي او اذربایجان، ارمنستان، کمبودیا، نیپال، متحده عربي امارات، ترکیه او سریلانکا د شانګهای همکارۍ سازمان غړي هېوادونه دي.
که څه هم د دغو هېوادونو ځينې له طالبانو سره اقتصادي او ډيپلوماټيکې اړيکې لري، خو یو هم طالبان په رسميت نه پېژني.
