د فلسطیني چارواکو په وینا، پر غزې ښار د اسراییل بریدونو کې تر دې دمه ۱۶زره او ۵۴ ماشومان وژل شوي دي. د غزې د حکومتي رسنیو دفتر ویلي، د وژل شویو ماشومانو له ډلې ۳۴ یې د لوږې له امله مړه شوي دي.
چارواکو زیاته کړې، چې په غزه کې د جګړې له پیله د وژل شویو ۳۸۳۴۵ فلسطینیانو په ډله کې لږ تر لږه ۱۰۷۰۰ ښځې هم شاملې دي او شاوخوا لس زره فلسطینیان لادرکه دي.ورته مهال د الجزیرې د راپور له مخې، د غزې د رسنیو د دفتر عمومي رییس اسماعیل الثوبته، اسراییلي ځواکونه د غزې په ښار کې د "پلان شوي قتل عام" په ترسره کولو تورن کړل او ویې ویل، چې دوی په لاسي توګه بې ځایه شوي فلسطینیان په نښه کوي.ژغورونکو ډلو ویلي، چې له سختو عملیاتو وروسته اسراییلي ځواکونه د حماس له مقاومت سره مخامخ شوي او د غزې د ښار له ځینو برخو یې شاتګ کړی دی؛ خو کوڅو کې په لسګونو جسدونه پراته وو.له بل پلوه اسراییلي رسنیو راپور ورکړی، چې نتانیاهو او د موساد مشر ډیویډ برنیا په غزه کې د اوربند او د ټولو بندیانو خوشې کولو لپاره ډیپلوماټیکې هڅې پېچلې کړې.دغې رسنۍ د باخبرو سرچینو په حواله ویلي، چې نتنیاهو د خبرو اترو په لړ کې خپل دریځ نور هم سخت کړی دی.
حماس وايي، چې په روانه اونۍ کې پر غزې د اسراییل سخت بریدونه ښایي د جګړې د پای ته رسولو هڅې په داسې حال کې له منځه یوسي چې خبرې اترې اصلي مرحلې ته رسیدلي دي.
دغې ډلې په یوه اعلامیه کې ویلي، چې تر اوسه یې د خبرو اترو د وضعیت په اړه تازه معلومات نه دي ترلاسه کړي.
حماس تېره اونۍ د امریکا په ملاتړ د اسراییل د سولې وړاندیز ته مثبت ځواب ورکړی و.
د غزې ښار اوسېدونکي وايي، چې د دې اونۍ بریدونه د اسراییل د عملیاتو د پیل له خورا سختې جګړې سره پرتله کېدلی شي، چې تېر کال رامنځته شوې وه او د دغه ښار پراخې سیمې یې ویجاړې کړې وې.
د غزې ښار چې د غزې د اوسېدونکې څلورمې برخې په کې ژوند کاوه، د ۲۰۲۳ کال په وروستیو کې د اسراییل د سختو بریدونو له امله نږدې ټول ویجاړ شو؛ خو بیا هم سلګونه زره فلسطینیان خپلو دغو ویجاړ شویو کورونو ته راستانه شوي وو.
خو اوس بیا د اسراییل پوځ دغو خلکو ته امر کړی چې خپل کورونه پرېږدي. ډیری خلک وايي، چې دغه کار به نه کوي.
۳۰ کلن محمد علي رویټرز خبري اژانس ته ویلي: "موږ به مړه کیږو خو سوېل ته به نه ځو. موږ نهه میاشتې لوږه او بمونه زغملي دي او موږ چمتو یو چې دلته د شهیدانو په توګه ووژل شو."
علي چې کورنۍ یې څو ځله نورو سیمو ته کډه شوې، وویل چې دوی د خوړو، اوبو او درملو له کمښت سره مخ دي.
هغه وايي: "اشغال (اسراییل) د غزې په ښار داسې بمباري کوي لکه جګړه چې بیا پیل شوې وي. موږ هیله لرو چې ژر اوربند وشي، او که نه کیږي، بیا نو هر څه چې د خدای رضا وي."
د غزې د روغتیا وزارت ویلي، چې دوی د غزې ښار په تل الحوا او صبرا ولسوالیو کې د خلکو د بند پاتې کېدو او د نورو د وژل کېدو راپورونه ترلاسه کړي؛ خو د روانو پراخو اسراییلي بریدونو له امله، ژغورونکي ډلې دغو سیمو ته نه شي رسیدلي.
د ملکي اضطراري خدماتو ادارې ویلي، اټکل کوي چې په تل الحوا او رمل سیمو کې لږ تر لږه ۳۰ کسان وژل شوي وي؛ خو د روانو اسراییلي عملیاتو له امله دوی دغه جنازې تر نړېدلو ودانیو نه شي راویستلی.
د اسرايیل پوځ د چهار شنبې په ورځ د غزې ښار اوسېدونکو ته وویل، چې د سوېل لور ته ولاړ شي او له دوو "خوندي لارو" کار واخلي.
ځینو په ټولنیزو رسنیو کې د "موږ نه ځو" هشټګ له لارې اسراییل ته ځواب ورکړی دی.
