د طالبانو د ریاست الوزرا سیاسي مرستیال دفتر د نشهيي توکو پر وړاندې د مبارزې لپاره د عالي کمیسیون جوړولو خبر ورکړ. مولوي عبدالکبير ويلي، چې د کمیسيون له جوړېدو يې موخه د نشهيي توکو پر وړاندې مبارزه او کروندګرو ته د بديل حاصلاتو موندل او په نشهيي توکو د روږدو کسانو درملنه ده.
د طالبانو د ریاست الوزرا سیاسي مرستیال دفتر د شنبې په ورځ د (چنګاښ ۲۳مه) د یوې خبرپاڼې په خپرولو سره ویلي، چې په لومړۍ ناسته کې د دغه کمیسیون د چارو پر څرنګوالي خبرې وشوې.
عبدالکبير ویلي، چې له نشهيي توکو سره د مبارزې په برخه کې د دوى دريځ څرګند دى او هيچا ته د نشهيي توکو د کښت، توليد او قاچاق اجازه نه ورکول کېږي.
په دغه ناسته کې د طالبانو کورنيو چارو وزارت له نشهيي توکو سره د مبارزې مشر عبدالحق ادعا کړې چې د کوکنارو ټولې کروندې يې له منځه وړې دي.
نوموړي ټینګار کړی، چې طالبان د نشهیي توکو پر وړاندې په مبارزه کې بریالي شوي او نړیواله ټولنه هم دا بریا مني.
د ملګرو ملتونو امنیت شورا په خپل تازه راپور کې ویلي، چې طالب مشرانو د کوکنارو پر کښت له بندیز څخه ګټه پورته کړې، خو کروندګر یې زیانمن کړي دي.
د دوحې په درېیمه ناسته کې طالبانو له نړیوالې ټولنې وغوښتل چې له افغان بزګرانو سره مرسته وکړي.
طالبانو د کوکنارو په کښت او د مخدره توکو په تولید بندیز لګولی دی.
خو تر دې مخکې ملګرو ملتونو په یوه نوي راپور کې ویلي وو چې په بدخشان ولایت کې د طالبانو د مشر حکم له پامه غورځول شوی دی.
