د ملي امنیت په ریاست کې یوه پخوانۍ مدیره، رییسه یزدانپرست وايي، چې طالبانو نوموړې په کابل کې له خپل کوره نیولې او یوه نیمه میاشت یې په زندان کې ربړولې ده. اغلې یزدان پرست افغانستان انټرنشنل ته وویل، چې طالبان د ملي امنیت د کارکونکو معلوماتو ته لاسرسی لري، هغوی نیسي او ربړوي.
رییسه یزدان پرست په جمهوري نظام کې د افغانستان د ملي امنیت ۰۵۰ ریاست د ښځو د څانګې مدیره وه.
نوموړي وايي، چې په کابل کې طالب وسله وال د ۱۴۰۰ کال د مرغومي په ۲۵مه نېټه د کورونو د پلټنې په پلمه د هغوې کور ته ننوتل.
نوموړې وايي، طالبانو د هغې کورته د ننوتلو سره سم پر دې د ټوپک په میل ګوزار وکړ.
هغې وویل: «ما خپله وسله طالبانو ته وسپارله، خو طالب جنګیالیو له ځانه سره یوړه او یوه نیمه میاشت د طالبانو د استخباراتو په ۴۰ ریاست کې د وسله په میل، سوک او لغتو ووهلم او ویې ربړولم.»
نوموړې وايي، چې طالبانو د ملي امنيت د کارکوونکو معلوماتو ته لاسرسى درلود او په دې توګه يې د ملي امنيت پخواني کارکوونکي پېژندل او نیول.
هغې زياته کړه، چې زوى يې هم د ملي امنيت په رياست کې دنده ترسره کوله او هېواد ته د طالبانو له ننوتلو مخکې يې هېواد پریښی وو.
د اغلې یزدانپرست له خوا افغانستان انټرنشنل ته په ورکړل شويو انځورونو کې ښکاري، چې د هغې مخ او بدن د شکنجې له امله شنه شوي دي.
نوموړې وايي، چې د ځايي مشرانو په منځګړتوب د ۱۴۰۰ کال د کب په ۱۵مه د طالبانو له بنده خوشې شوه او له خوشې کېدو وروسته له افغانستانه وتښتېده.
اغلې یزدانپرست چې د ډګروالي رتبه لري وايي: د افغانستان د پخواني ولسمشر ډاکټر نجیب الله له حکومت راهیسې د طالبانو له لومړۍ دورې پرته، د ملي امنیت په ریاست کې یې کار کړی دی.
هغې وويل: «ما ۲۵ کاله د ملي امنيت په رياست کې خدمت کړی دی.»
اغلې یزدان پرست وايي، چې هغه د زندان په کوټه کې یوازې بندي وه او د زندان ټول ساتونکي نارینه وو.
د نوموړې په خبره، له زندانه تر خوشې کېدو وروسته یو کال تر درملنې لاندې وه.
نوموړې وايي، چې طالبانو یې خاوند ۱۳۸۷ کال کې له بهرنیانو سره د کار کولو له امله وواژه.
هغې وویل: «زما میړه د حامد کرزي د ولسمشرۍ پر مهال د بګرام په هوايي ډګر کې ژباړونکی و.»
نوموړې وايي: «طالبانو څو څو ځله زما خاوند ته ګواښونه کړي وو، چې له بهرنيانو سره کار ونه کړي، خو خاوند مې د طالبانو ګواښونه له پامه وغورځول او يو سهار يې کار ته د تللو پر مهال وواژه.»
اغلې یزدانپرست د طالبانو عمومي بښنه یو "چل" ګڼي او وايي چې هېڅوک باید پر دې ډلې باور ونه کړي.
په ورته وخت کې یوې ښځینه فعالې لیلما دولتزۍ له افغانستان انټرنشنل سره په مرکه کې ویلي، چې طالب جنګیالیو د هغې ورنونه په چاقو پرې کړي او پر زخمونو کې یې مالګې ور اچولې دي.
د طالبانو په بندخونو کې دا لومړی ځل نه دی چې بندیان ربړول کېږي، په دې وروستیو کې ګارډین ورځپاڼې او رخشانه رسنۍ په یوه ګډ راپور کې ویلي چې طالب ځواکونو په زندان کې د بشري حقونو پر یوې فعالې جنسي تېری هم کړی دی.
