فرانسوي چارواکو له «ترهګرۍ» او نورو ګواښونو سره د تړاو له امله د المپیک په لوبو کې له ۳۵۰۰ څخه د زیاتو کسانو غوښتنلیکونه رد کړي دي. د فرانسې د کورنیو چارو وزیر وايي، چې د هغو غوښتونکو د معلومولو لپاره چې «لوبې او ملي امنیت ته ګواښ» وو، په سلګونو زره څېړنې ترسره شوې دي.
لږ تر لږه ۱۳۰ غوښتونکي د «شکمنو ترهګریزو» فعالیتونو په نوملړ کې وو.
دغه راز په لسګونو نور غوښتونکي له «سخت دریځو اسلامپالو»، کیڼ اړخو او ښي اړخو فرانسوي ډلو سره تړاو لري.
د پاریس د اولمپیک په لوبو کې چې د جولای له ۲۶څخه د اګست تر ۱۱مې نیټې پورې به روانې وي، شاوخوا یو میلیون خلکو ته د لوبغاړو، روزونکو، خبریالانو، داوطلبانو او شخصي امنیت ساتونکو په ګډون په حساسو سیمو کې د ننوتلو لپاره امنیتي سندونه او جوازونه ورکړل شوي دي.
د اوړي د المپیک سیالیو چارواکو د ساتونکو د سخت کمښت په اړه اندیښنه ښودلې ده.
د فرانسې د ځنګړي امنیت فدراسیون په اپریل کې ویلي و، چې د ۸۰۰۰ کسانو له کموالي سره مخ دي.
خو تېره اوونۍ دغه کمښت ۱۰۰۰ کسانو ته راټیټ شو.
د اولمپیک په روانو لوبو کې به د فرانسې په پلازمینه کې له ۳۰۰ زرو څخه تر ۴۵۰ زرو پورې پولیس د امنیت د ټینګښت لپاره په دندو بوخت وي.
