د هېواد پخواني ولسمشر د ننګرهار په ګډون په ځینو ختیځو او مرکزي سیمو کې د وروستیو خونړیو سېلابونو او توپانونو له امله پر اوښتې مرګژوبلې خواشیني څرګنده کړه. اشرف غني په خپل اېکس کې لیکلي، چې افغانستان تر بل هر ځایه له اقلیمي بدلون څخه ډېر زیانمنېدونکی دی.
نوموړی همداراز وایي، چې د ورته تکرارېدونکو پېښو مالي عواقب د هېواد او کورنیو پر مات اقتصاد ځورونکې اغېزې کولی شي.
له ننګرهار ولایت څخه سرچینې وایي، چې تر دا مهاله د ۴۷ تنو د مړینې پخلی شوی؛ خو لا هم ولسي خلک په یو شمېر هغو کسانو پسې ګرځي، چې تر دې مهاله تري تم دي.
سرچېنې وايي، چې په دغه ولایت کې راوتلو سېلابونو د جلال اباد ښار، بټي کوټ، سره رود او د بهسودو په ولسوالیو کې خلکو ته ډېر ځاني او مالي زیانونه اړولي دي.
دا په داسې حال کې ده، چې د ننګرهار تر څنګ په پنجشیر، کاپیسا، لغمان، کونړ او میدان وردګو ولایتونو کې هم پرون سېلابونه راوتلي دي.
تر اوسه د دې سېلابونو د مرګژوبلې په اړه څه نه دي ویل شوي، خو د ځینو رسنیو د راپورونو له مخې د کاپیسا ولایت په اله سای او نجراب ولسوالیو کې د دریو تنو د مړینې خبرونه ورکړل شوي دي.
افغانستان چې د اقلیمي بدلون له اړخه د نړۍ له زیانمنونکو هېوادونو څخه بلل کیږي، د بېلابېلو طبیعي پېښو له امله یې چاپېریال ته سخت زیان اوښتی دی.
د افغانستان لپاره د ملګرو ملتونو د سرمنشي ځانګړې استازې روزا اوتونبایوا هم څه موده وړاندې ویلي و، چې افغانستان په نړۍ کې د اقلیمي بدلون له امله یو له زیانمنو هېوادونو څخه دی او د اقلیمي بدلون له امله د احتمالي پېښېدونکو زیانونو لپاره یې باید تابیاوې ونیول شي.
د معلوماتو پر بنسټ؛ دغه کسان د جلال اباد ښار، سره رود او بهسود ولسوالیو څخه راوړل شوي دي.
هغه انځورونه او ویډیوګانې چې افغانستان انټرنشنل ـ پښتو ته رارسېدلي پکې لیدل کیږي، چې د سخت طوفان له امله د کورونو ترڅنګ د برېښنا ستنې او ونې وېجاړې شوي دي.
اوس مهال د ننګرهار په سیمه ییز روغتونو کې بېړنۍ حالت اعلان شوی دی.
د طالبانو تر کنټرول لاندې د ننګرهار د عامې روغتیا ریاست سرچېنې وايي؛ اوس هم له یو شمېر سیمو څخه مړي او ټپیان د لېږدولو په حال کې دي.
د رارسېدلو راپورنو له مخې؛ یوازې د ننګرهار سره رود ولسوالۍ کې د کور د چت راپرېوتو له امله لس کسان د خاورو لاندې شوي دي، چې ناتایید شوي راپورونه وايي، چې دغه کسان ټول مړه شوي دي.