طالبانو د ۲۵ مېلیونه ډالرو په ارزښت د لمري برېښنا د ۳ پروژه هوکړې لاسلیک کړې

د طالبانو د اوبو او انرژۍ وزارت د ۲۵ مېلیونه ډالرو په ارزښت د پکتیکا، روزګان او فراه ولایتونو لپاره د لمري برېښنا د درېو پروژو هوکړه لیکونه امضا کړل. دغه وزارت یوه خبرپاڼه کې وايي، چې دا هوکړه لیکونه له عوفي بهرام شرکت سره لاسلیک شوي دي.

په خبرپاڼه کې د دغه وزارت د سرپرست عبداللطیف منصور له قوله لیکل شوي، چې د دغو پروژو په پلي کولو سره ۲ مېګاواټه برېښنا په پکتیکا، ۳ میګاواټه په روزګان او ۳ میګاواټه په فراه کې تولیدېږي.
د ښاغلي منصور په خبره، په دې پروژې سره به د یادو ولایتونو ۵۰۰۰ کورنۍ شپه او ورځ برېښنا ولري.
د طالبانو د اوبو او انرژۍ وزارت سرپرست د عوفي شرکت د رییس له قوله وایي، چې ټاکل شوې دا شرکت په کابل کې هم د سل مېګاواټه برېښنا د تولید لپاره پانګونه وکړي.