د اوکراین ولسمشر ولادیمیر زيلنسکي وایي، چې پولنډ غواړي دې هېواد ته اف - ۱۶ جنګي جېټ الوتکې ورکړي. رویټرز خبري اژانس د نوموړي له قوله راپور ورکړی، چې پولنډ پرېکړه کړې څو اوکراین ته د اف - ۱۶ جنګي جېټ الوتکو د ورکړې بهیر ګړندی کړي.
د دغه راپور له مخې، پولنډ چې له اوکراین سره پوله لري او د جګړې پر مهال یې نږدې متحد هم پاتې شوی دی، یو له هغو هېوادونو څخه دی، چې اوکراین ته یې د الوتکو د ورکولو ژمنه کړې ده.
زيلنسکي په داسې حال کې د دغو مرستو خبر ورکوي، چې د پولنډ د لومړي وزیر دفتر بیا تر اوسه په دې اړه څه نه دي ویلي.
د اوکراین ولسمشر همداراز ویلي: «کیف د خپلو لومړنیو اف - ۱۶ الوتکو سپارلو ته په بیړې سره انتظار باسي.»
د نوموړي په وینا، اوکراین تمه لري چې په دغو مرستو سره به د دې هېواد د هوایي ځواک وړتیاوې نورې هم زیاتې شي.
دغه مرستې په داسې حال کې کیږي، چې تېره اونۍ د امریکا د بهرنیو چارو وزارت هم اوکراین ته له ډنمارک او هالنډ څخه د جنګي جېټونو د لېږلو خبره کړې وه.
روسیې د اوکراین پر ضد پوځي عملیات د ۱۴۰۰ کال (د کب په ۵مه) نېټه پیل کړل، چې له هماغه مهاله تر اوسه د دواړو هېوادونو تر منځ مرګونې جګړې روانې دي.
دا په داسې حال کې ده، چې د شپیګل اونیزې د دوشنبې په ورځ (د چنګاښ په ۲۵مه) خبر ورکړی و، چې داسې محرم اسناد یې تر لاسه کړي چې ښيي که له روسیې سره جګړه پیل شي؛ نو د جرمني دولت وار د مخه د دغه هېواد په ختیځو سیمو کې د ناټو ټلوالې د سلګونه زرو ځواکونو د ځای پر ځای کولو لپاره پر چمتوالي بوخت دی.
د دغه راپور پر بنسټ، برلین تمه لري چې د لویدیځوالو او مسکو تر منځ د جګړې له پیل سره سم به په جرمني کې د ناټو ټلوالې ۸۰۰ زره ځواکونه ځای پر ځای شي، چې د روسیې د ځواکونو پر وړاندې مقابله وکړي.
