د طالبانو د ترافیکو ریاست اعلان کړی چې کومو ټکسیو تر اوسه خپل ژېړ رنګ پر فیروزيي او سپین نه دی بدل کړی، د فعالیت اجازه نه لري. دې ادارې پرون خبرداری ورکړ، چې که شخصي موټر هم مسافر وړي، له «قانوني چلند» سره به مخ شي.
طالبانو د ۱۴۰۰ کال لومړیو کې اعلان وکړ چې دوی پریکړه کړې چې د ښار ټکسیو رنګ له ژیړ څخه فیروزيي ته بدل کړي.
په همدې ډول د طالبانو د کورنیو چارو وزارت د ۱۴۰۱ کال د لیندۍ په ۱۴مه اعلان وکړ چې د ټکسيو رنګ یې له «ژېړ او سپین» څخه «روښانه فیروزيي او سپین» ته بدلوي.
د طالبانو د ترافيکو رياست هغه وخت ويلي وو چې د هرې ټکسي رنګ به په ۹۱۱۰ افغانيو بدل شي.
د ټکسيو چلوونکو یوې ډلې وروسته له هغې احتجاج وکړ، چې طالبانو پریکړه وکړه چې د خپلو موټرو رنګ بدل کړي.
دغو موټر چلوونکو وويل، چې د رنګ د بدلون لپاره د پيسو ورکولو توان نه لري.
دوی ویلي و، طالبانو پرېکړه کړې چې د ټکسيو رنګ بدل کړي، څو له موټر چلوونکو پيسې واخلي.
خو طالب چارواکي بیا ادعا کوي. چې د امنیت د ښه کولو، د جرمونو د کمولو او د ښار د ښکلا لپاره یې د ټکسيو د رنګ د بدلولو پرېکړه کړې ده.
په افغانستان کې د پخواني حکومت پر مهال په ښارونو کې په ژېړ او سپین رنګونو ښاري ټکسۍ چلېدلې او ځینې موټرې چې شخصي لایسنس پلېټونه یې درلودل په ښارونو کې مسافر لېږدول.
