د طالبانو د بهرنیو چارو وزارت د یمن په حدیده بندر کې د اسراییل د برید له امله د ملکي کسانو مرګ ژوبله وغندله. دغه وزارت د یوې خبرپاڼې په خپرولو سره له نړۍوالو سازمانونو او له سیمه ییزو هېوادونو غوښتي، چې په غزه او سیمه کې د اسراییل د جنایتونو مخه ونیسي.
د طالبانو د بهرنیو چارو وزارت زیاته کړې، چې که نړۍوال د اسراییل د بریدونو مخه و نه نیسي، د غزې په شاوخوا سیمو کې به د زیاتو تلفاتو او ویجاړیو لامل شي.
ایراني رسنیو د رویټرز خبري اژانس په حواله لیکلي، چې اسراییل د تل ابیب په شاوخوا سیمو کې د یمن د حوثي اورپکو له برید یوه ورځ وروسته حدیده بندر ته نږدې د حوثیانو پر پوځي اهدافو بریدونه وکړل، چې له امله یې درې کسان ووژل شول او ۸۷ کسان ټپيان شوي دي.
یمني رسنیو د دې هېواد د عامې روغتیا وزارت له قوله لیکلي؛ د اسراییل دغه بریدونه چې پر نفتي تاسیساتو شوي، ډېری ټپیان یې سوځیدلي او حالت یې نازک ښودل شوی دی.
بل خوا د اسراییل د پوځ ویاند بیا ویلي، چې دې هېواد په یمن کې د حوثي اورپکو پر هغو پوځي اهدافو بریدونه کړي، چې د ایران د تسلیحاتي مرستو په موخه ترې کار اخیستل کېده.
د رویټرز د راپور له مخې؛ د یمن د حوثيانو سیاسي شورا بیا اعلان کړی چې د اسراییل دا بریدونه بې ځوابه پاتې نه شي.
