له پکتیا څخه سرچینې وايي، چې د دغه ولایت څمکنیو ولسوالۍ د مده خیلو وېش کلي اوسېدونکی رییس نومی چې په مخکیني حکومت کې سیمه ییز پولیس و، طالبانو وژلی. ویل کیږي، د سیمې طالبانو نوموړی دوه اوونۍ وړاندې له کوره بیولی و او تېره ورځ یې مړی موندل شوی.
د وژل شوي سرتیري د کورنۍ غړو افغانستان انټرنشنل پښتو ته وويل، چې ځايي طالبانو یې د کورنۍ دغه غړی چې په مخکیني حکومت کې د سیمه ییزو پولیسو سرتیری و دوه اوونۍ وړاندې له کوره په زور ویوست او دوی ته یې هیڅ معلومات نه و چې چیرته یې وړی خو وايي، تېره ورځ یې مړی موندلی دی. «بس زور یې دی، راغلل رییس یې په زور بوتلو او دوه هفتې ورک و، موږ ته هیڅ معلومات نه کېدل، ټوټه ټوټه یې کړی.»
په څمکنیو کې د وژل شوي سرتیري خپلوان وايي، چې د هغه په جسد یې د وهلو او ربړولو نښې لیدلې او له نښو نښانو داسې ښکاري چې هغه دې طالبانو په وهلو، شکنجې او ځورولو وژلی وي.
طالبانو په دې اړه څه نه دي ويلي، او نه یې مخکې تر دې د پخواني حکومت د کارکونکو او سرتیرو د وژنو په اړه معلومات ورکړي.
د پکتیا ولايتي شورا پخوانی وکیل تاج محمد منګل وايي، د سیمه ییزو پولیسو پخواني دغه وژل شوي سرتیري د تېر جمهوري حکومت له پرځېدو وروسته په خپل کلي کې عادي ژوند کاوه.هغه وايي، «خاموشي او مظلومیت هم حد لري،دومره بې وسي چې د خپلې کورنۍ، کلیوال، خپلوان او وطندار پوښتنه نه شې کولای چې ولې یې وژنې؟ نن راشي په ماښام یې له کوره وباسي، بله ورځ یې ټوک ټوک جسد پروت وي او وژلی یې وي.»
واک ته د طالبانو له رسیدو وړاندې د طالبانو مشر ملا هبت الله، د پخواني حکومت ټولو ملکي او پوځي کارکوونکو ته عمومي بښنه وکړه، خو طالبانو د خپل مشر دغه امر په ډیرو پېښو کې نه دی منلی او ډیر شمیر پخواني امنیتي ځواکونه د طالبانو له خوا سخت ځورول شوي، ووژل شوي او یا هم تري تم دي، یو شمیر نور بیا د طالبانو له ویرې لا هم په پټه ژوند کوي.
