د طالبانو د ویاند مرستیال په افغانستان کې د بشري حقونو د وضعیت په اړه د یوناما وروستی درې میاشتینی راپور له «واقعیت لرې او عقده يي» وباله. حمدالله فطرت وایي، «په افغانستان کې شرعي قوانین نافذ او د ټولو افغانانو شرعي حقوق تامین دي.»
یوناما دوه ورځې وړاندې په افغانستان کې د بشري حقونو، ښځو، رسنیو او په عام محضر کې د خلکو د مجازات په اړه خپل درې میاشتنی راپور خپور کړ.
په راپور کې راغلي، چې په تېرو درېو میاشتو کې پر ښځو او رسنیو د طالبانو محدودیتونه زیات شوي دي.
د راپور په بله برخه کې راغلي، چې په تېرو درېو میاشتو کې طالبانو د ۲۸ ښځو په ګډون ۱۴۷ کسان په عام محضر کې مجازات کړي دي.
یوناما په دې راپور کې د ۶۰ کسانو د خپلسرو نیونو، د ۱۰ کسانو د شکنجه کولو او د تېر حکومت د پنځو چارواکو او د امنیتي ځواکونو وژنې مستند کړې دي.
خو حمدالله فطرت بیا د دغه راپور په غبرګون په خپل اېکس کې لیکلي: «موږ د یوناما دا راپور ردوو او طالبان د خلکو حقوقو ته د یوې شرعي او دیني وجیبې په سترګه ګوري.»
یوناما د طالبانو کړنې د بشري حقونو نقض بولي، خو فطرت وایي: «دا څرګندونې د اسلامي شریعت د سپیڅلو احکامو ښکاره بې احترامي ده او د مسلمانانو احساسات ژوبلوي.»
د نوموړي په خبره، یوناما باید د افغانستان د مسلمانې ټولنې معتقداتو او باورونو ته درناوی ولري.
یوناما په خپل راپور کې د افغانستان د امنیتي وضعیت په اړه هم لیکلي، چې په تېرو درېو میاشتو کې د افغانستان په بېلابېلو سیمو کې د اتو ترهګریزو بریدونو له امله ۱۶ ملکي کسان وژل شوي او اووه ویشت نور ټپيان شوي دي.
د راپور له مخې؛ ډېری دا بریدونه او نښتې په کابل، هرات، بامیان، کندهار او بدخشان ولایتونو کې شوې دي.
