د طالبانو د اوبو او انرژۍ وزارت له افغان کارپوهانو وغوښتل، چې خپل هېواد ته ستانه شي
د طالبانو د اوبو او انرژۍ وزیر په کابل کې د یوې خبري غونډې پر مهال له افغان کارپوهانو غوښتنه وکړه، چې خپل هېواد ته راستانه شي.
د طالبانو د اوبو او انرژۍ وزیر په کابل کې د یوې خبري غونډې پر مهال له افغان کارپوهانو غوښتنه وکړه، چې خپل هېواد ته راستانه شي.
عبداللطیف منصور وویل، ځیني کاپوهان ښايي له طالبانو دا وېره ولري چې ترېنه غچ وانخلي؛ خو نوموړی وايي چې دوی کولای شي د طالبانو د مشر له «عمومي بخښنې» ګټه پورته کړي.
د طالبانو د اوبو او انرژۍ وزیر عبداللطیف منصور د شنبې په ورځ (د زمري په ۱۳مه) د حکومت د اطلاعاتو او رسنیو په مرکز کې خبریالانو ته وویل، چې په دغو کارپوهانو د دولت لګښت شوی؛ که هغوی غواړي بېرته خپل هېواد ته راستانه شي، نو د هغوی د با عزته ستنېدو لپاره به دوی زمینه برابره کړي.
د طالبانو د اوبو او انرژۍ وزیر داسې مهال افغان کارپوهان بېرته خپل هېواد ته د ستنېدلو لپاره هڅوي، چې یو شمېر دولتي او پوځي کارکوونکي افغانستان ته تر ستنېدو وروسته د طالبانو د استخباراتو لهخوا نیول شوي دي.
سیمهییزو سرچېنو د شنبې په ورځ افغانستان انټرنشنل ته وویل، چې د طالبانو د استخباراتو کارکوونکو د لغمان په ولایت کې،دوه تنه هغه پخواني پوځیان چې له ایرانه راستانه شوي وو، نیولي دي.
دغه دوه پخواني پوځیان «ګلنبي» او «پاچاګل» نومېده، چې له ایرانه د دولت شاه ولسوالۍ ته ستانه شوي وو.
تېره اونۍ د عبدالرشید دوستم په مشرۍ د افغانستان اسلامي جنبش هم ویلي و، چې د عزت الله په نوم د دوی یو قوماندان له ایرانه د ستنېدو وروسته د سرپل په ولایت کې وژل شوی و.
