د بنګله دېش لومړۍ وزیرې شیخ حسینه د دوشنبې په ورځ استعفا وکړه او له دې هېواده وتښتېده. د بنګله دېش د پوځ مشر جنرال وقار الزمان په یوه ټلویزیوني وینا کې ویلي، چې ۷۶ کلنه حسینه له هېواده وتلې او ډېر ژر به موقت حکومت جوړ شي.
د راپورونو له مخې، یاد جنرال اوسمهال د موقت حکومت د جوړېد و په اړه د دغه هېواد له سیاسي ګوندونو او مدني فعالانو سره د خبرو اترو په حال کې دی.
اخوا، معترضان بیا د ښاغلې حسینې له استعفا وروسته په واټونو کې نڅاوې او خوشحالۍ کوي.
رویټرز خبري اژانس راپور ورکړی، چې شیخ حسینه له خپلې خور سره په یوې پوځي چورلکه کې د هند ختیځ ته روانه شوې ده.
د بنګله دېش لومړۍ وزیرې له هغې وروسته استعفا وکړه، چې زرګونو معترضانو یې په کور برید وکړ.
دا په داسې حال کې ده، چې نن بیا په بنګله دېش کې انټرنټ هم پرې شوی او دولت د درېو ورځو لپاره رخصتي اعلان کړې ده.
په بنګله دېش کې له یوې میاشتې راهیسې اعتراضونه او تاوتریخوالي روانې دي، چې تر اوسه په کې ۳۰۰ کسان وژل شوي دي.
د شمېرو له مخې یوازې د یکشنبې په ورځ د لومړۍ وزیرې شیخ حسینه د مخالفانو، امنیتي ځواکونو او د واکمن ګوند د پلویانو ترمنځ تاوتریخوالي کې د لږ تر لږه ۱۴ پولیسو په ګډون ۹۵ تنه وژل شوي.
د بنګله دېش پولیسو له دې وړاندې ویلي و، چې د دغه هېواد مرکز ډهاکې ښار د «جګړې په ډکر» بدل شوی او زرګونو لاریون کوونکو په ډهاکه کې یوه روغتون ته څېرمه موټرو او موټرسایکلو ته اور اچولی دی.
دغه لاریون د بنګله دېشي زدهکړیالانو له لوري له هغه وروسته پیل شو، چې هلته واکمن حکومت د دولتي کسانو خپلوانو ته د امتیازونو د ورکړې پرېکړه وکړه.
