د هند په کېرالا ایالت کې د ځمکې ښویېدنې له امله څو کلي ویجاړ شوي، لسګونه کسان مړه او لسګونه لا هم تري تم دي. هلته ځايي چارواکو رسنیو ته ویلي، چې د پېښې د قربانیانو لټون دوام لري.
د کېرالا ځايي وزیر اېم بي راجېش رسنیو ته ویلي، «موږ به لټون ته دوام ورکوو».
نوموړی وایي، تر ځمکې لاندې شویو کسانو د موندلو په موخه د ژغورونکو ۳۰۰۰ کسیزه ډله په عملیاتو بوخته ده.
نوموړي ویلي، چې د ځمکې ښوېېدنې له پېښې څو ورځې وروسته لا هم خلک تر خاورو لاندې پاتې دي.
د معلوماتو له مخې، د ځمکې ښویېدو له امله شاوخوا ۲۰۰ کسان لادرکه شوي دي.
د راپور له مخې، په لویدیرځ ګاټ کلي کې شاوخوا ۲۰۰ کسان (د جولای په ۳۰مه) سهار مهال چې کله ویده وو، د دغه پېښ شوي ناورین له امله ورک شوي دي.
ایالتي حکومت د ځمکې ښوېېدنې په دغه پېښه کې د وژل شویو کسانو شمېر ۲۲۲ تنه ښودلی؛ خو رسنیو بیا د تلفاتو شمېر ۳۵۰ تنه یاد کړی دی.
د راپورونو له مخې، د ژغورنې کارکوونکو د کورونو له خټو او خاورو لاندې د انسانانو د بدن ۱۸۰ برخې پیدا کړې دي.
هلته ځايي چارواکو ویلي، چې تر خاورو لاندې موندل شوي مړي او د بدن غړي به ټولو مذهبونو ته په درناوي ښخ او یا وسوځول شي.
