په بنګله دېش کې د پخوانۍ لومړۍ وزیرې حسینه واجد له استعفا وروسته، د لنډمهالي حکومت د جوړولو بهیر پیل شو. د بنګله دېش په رسنیو کې راغلي، چې د نوبل جايزې ګټونكی ډاكټر محمد يونس د لنډمهالي حكومت د مشر په توګه ټاكل شوى دى.
د لندمهالي حکومت د جوړولو پرېکړه په ولسمشرۍ ماڼۍ کې په هغه مشورتي غونډه کې وشوه، چې د درې ګونو قواوو او د زدهکړیالانو د غورځنګ مشرانو په کې ګډون کړی و.
د بنګله دېش رسنۍ وايي، د لنډمهالي حکومت د پاتې غړو په اړه به له بېلابېلو سیاسي ګوندونو سره تر سلا مشورې وروسته پرېکړه کېږي.
د يادونې وړ ده، چې د شيخ حسينې د حکومت له ړنګېدو وروسته د بنګله دېش د زدهکړیالانو غورځنګ په دغه هېواد کې د پوځي حکومت له منلو انکار وکړ او د ډاکټر يونس په مشرۍ يې د لنډمهالي حکومت د جوړېدو غوښتنه وکړه.
