د ملګرو ملتونو د وګړو صندوق ویلي، چې په غزه کې یو میلیون ماشومان رواني ملاتړ ته اړتیا لري. دغه سازمان وايي، په غزه او د دې سیمې په شمال کې د جنسیت پر بنسټ د تاوتریخوالي راپورونه په زیاتېدو دي ځکه چې د ټولنیزو خدمتونو مرکزونه تړل شوي او کارکوونکي یې تښتېدلي.
ملګرو ملتونو په یوه خبرپاڼه کې د چهارشنبې په ورځ د (زمري ۱۷مه) نېټه ویلي، چې په غزه کې د رواني خدمتونو وړاندې کول «جدي اړتیا» ده.
د خبرپاڼې له مخې: «اوسمهال په غزې تړانګه کې شاوخوا ١،٩ ميليونه تنه بې ځايه شوي، چې ډیری یې په لنډمهاله، ناامنه او ناپاکو سرپناوو کې ژوند کوي او لومړني روغتیایي خدمتونو ته لږ لاسرسي لري او د ناروغیو او جنسي تاوتریخوالي سره مخ دي.»
د ملګرو ملتونو د خبرپاڼې له مخې، د دغو ننګونو د له منځه وړلو په موخه، د ملګرو ملتونو د وګړو صندوق د غزې په ښار او د هغې په شمال کې د کډوالو په کمپونو کې له شپږو ځایونو څخه د مرستې او رواني ټولنیزو خدمتونو او د جنسي او د زیږون په برخه کې روغتیایي خدمتونه وړاندې کوي.
تر دې مخکې د ملګرو ملتونو د ماشومانو صندوق (یونېسف) ویلي و، چې په غزه کې ۱۷ زره ماشومان بې سرپرسته دي.
د دغه سازمان د راپور له مخې، په غزه کې له هرو ۱۰ ماشومانو څخه نهه یې هغو خوړو ته لاسرسی نه لري چې د سالمې ودې لپاره ورته اړتیا لري.
