د افغانستان لپاره د امریکا شارژدافیره وایي، چې د طالبانو له بند څخه د امریکایي وګړو خوشې کول د افغانستان لپاره د امریکا د ماموریت لومړیتوب دی. کرن ډېکر په خپل اېکس کې لیکلي، چې متحده ایالات هڅه کوي د طالبانو له بند څخه درې امریکایي وګړي خوشې کړي.
نوموړې همداراز زیاته کړې: «موږ به هیڅکله د ریان کوربیټ، محمود حبیبي او جورج ګلیزمن د خپلو کورنیو سره د بیا یو ځای کولو لپاره له خپلو هلو ځلو لاس په سر نه شو.»
راپورونه ښیي، چې طالبانو په ۱۴۰۱ کال کې ریان کوربټ، جورج ګلیزمان او افغاني الاصله امریکايي محمود حبیبي په جلا - جلا عملیاتو کې نیولي دي.
تېر کال د ریان کوربیټ مېرمنې له رسنیو سره په خبرو کې ویلي وو، چې د خاوند روغتیايي وضعیت یې مخ په خرابېدو دی.
د طالبانو ویاند ذبیح الله مجاهد بیا د روان کال د چنګاښ په ۱۳مه وویل، چې په افغانستان کې بندي امریکایي وګړي به په «امریکا او ګونټانامو بندخونه کې د افغان بندیانو د خوشې کېدو په بدل کې ازاد شي.»
مجاهد دا هم ویلي وو، چې د دوحې په ناسته کې یې له امریکایي چارواکو سره د بندیانو پر تبادلې خبرې کړې دي.
امریکایي چارواکو تراوسه په دې اړه څه نه دي ویلي، چې د طالبانو شرط یې منلی او که نه.
که څه هم طالبانو تر اوسه د نیول شویو امریکایانو د جرم او د نیولو د وخت په اړه څه نه دي ویلي، خو په پاکستان کې د طالبانو پخواني سفیر عبدالسلام ضعیف د طالبانو په زندان کې یاد درې امریکايي بندیان "جاسوس" بللي دي.
د یادولو ده، چې د روان کال په وري میاشت کې د طالبانو د بندخونو د ادارې نظامي مرستیال ویلي وو، چې د دوی په بندخونو کې شاوخوا ۴۰ بهرني وګړي بندیان دي.
