ایراني پولیسو په تبرېز کې ۲۱ کډوال نیولي دي

دغه ایراني چارواکي د هېواد له اتباعو هم وغوښتل، د هغو کارونو په اړه چې کډوال په ځانګړې توګه افغانان پکې ګمارل کیږي په اړه یې پولیسو ته خبر ورکړي.

ایراني چارواکي په عمومي ډول د افغان کډوالو لپاره د «بې اسناده اتباعو» اصطلاح کاروي.

تر دې مخکې د ایران د کورنیو چارو وزیر سکندر مومني د پنجشنبې په ورځ (د وږي ۱۵مه) وویل، چې په دغه هېواد کې د افغانانو د تنظیم لپاره به هر اړخیز پلان ډېر ژر ترتیب او عملي شي. مومني وويل: "دغه بشپړ پلان به د يو مناسب پروګرام او سيمه ييزو او ګاونډيو ملحوظاتو په پام کې نيولو سره پلي شي."

په افغانستان کې د طالبانو له واکمنۍ وروسته ډېری افغانان ګاونډیو هېوادونو په ځانګړې توګه ایران ته کډه شوي دي.

د دغو مهاجرینو یوه برخه د پخواني حکومت کارکوونکي او سرتېري دي، چې د طالبانو له وېرې ایران ته تښتیدلي دي.

دا په داسې حال کې ده، چې د ایران حکومت په وروستیو میاشتو کې د افغان کډوالو د نیولو او شړلو لړۍ چټکه کړې او د اوسېدو له اسنادو پرته افغانان افغانستان ته ستنوي.

د طالبانو د کډوالو وزارت د معلوماتو له مخې؛ هره ورځ لسګونه کورنۍ د ایران له پولې افغانستان ته ستنیږي.