اروپايي ټولنه: د امربالمعروف قانون پر ښځو یو بل ګوزار دی، موږ یې نه شو زغملی
اروپايي ټولنې د دوشنبې په ورځ وویل، چې د طالبانو د امربالمعروف نوی قانون د افغان ښځو او نجونو حقونو ته یو بل «جدي ګوزار» دی او اروپايي ټولنه یې نه شي زغملی. دغه اتحادیې ویلي، چې دغه قانون د افغانانو پر ژوند سخت بندیزونه تاییدوي او پراخوي.
اروپايي اتحادیې د دوشنبې په ورځ په یوه اعلاميه کې وویل: «موږ به د بشري حقونو او ډېموکراتیکو اصولو تر پښو لاندې کولو پر وړاندې محتاط واوسو، په ځانګړې توګه په هغو سیمو کې چې استبدادي رژیمونه دا نړۍوال ارزښتونه ګواښي.»
په افغانستان کې د بشري حقونو د خرابو شرایطو او پر افغان ښځو او نجونو د سختو بندیزونو لګولو ته په پام اروپايي ټولنې د افغانستان لپاره د ملګرو ملتونو د ځانګړي راپور ورکوونکي د ماموریت د غځولو غوښتنه کړې ده.
د اتحادیې په اعلاميه کې راغلي: «له همدې امله موږ په دې مجلس کې په افغانستان کې د ځانګړي راپور ورکوونکي د ماموریت د غځولو لپاره د یوه پرېکړه لیک وړاندیز کوو.»
اتحادیه وايي، په افغانستان کې د طالبانو له خوا رامنځته شوي شرایط، په ځانګړې توګه د افغان ښځو او نجونو پر زده کړو او کار سخت بندیزونه، د ملګرو ملتونو د بشري حقونو شورا «بشپړې پاملرنې» ته اړتیا لري.
په ۱۴۰۰ لمزیز کال کې د طالبانو له بیا واک ته رسېدو سره دغې ډلې په افغانستان کې پر مېرمنو کلک بندیزونه لګولي، چې دغې چارې د نړۍوالو او کورنیو بنسټونو غبرګونونه راپارولي دي.
