روغتیایي چارواکي: په خیبرپښتونخوا کې د اېم پاکس پنځمه پېښه ثبت شوه

هغه وویل:« پنځمه پېښه په هغه ۳۳ کلن کس کې لیدل شوې، چې د سپټمبر په اومې نېټې د اسلام اباد نړۍوال هوایي ډګر له لارې له سعودي عربستان څخه پاکستان ته راغلی و.»
هغه زیاته کړه، چې ناروغ په لوی دېر کې په خپل کور کې قرنطین شوی دی.
ښاغلي شاه همداراز ویلي، چې تر دې دمه د ټولو ۱۷ شکمنو ناروغانو له معاینې وروسته پنځه پېښې تایید شوې دي.
تر دې وړاندې د سپتمبر په لومړۍ نېټه په پاکستان کې د اېم پاکس څلورمه پېښه هم په پېښور کې ثبت شوې وه او د دغې ناروغۍ درې نورې پېښې هم د پېښور په هوایي ډګر کې تایید شوې وې.
د روغتیایي ادارو په وینا، د یکشنبې په ورځ (د سپتمبر په ۸مه نېټه) په خیبرپښتونخوا کې ټول څلور ناروغان تر رغېدو وروسته رخصت شوي دي.
تیره میاشت د روغتیا نړۍوال سازمان د اېم پاکس تر خپرېدا وروسته د عامې روغتیا بېړنی حالت اعلان کړی و.