د ایران ولسمشر مسعود پزشکيان د اسنادو له وړاندي کولو پرته ادعا کړې، چې امریکا د لبنان د حزب الله د مشر حسن نصرالله د وژلو امر کړی دی.
پزشکيان د شنبې په ورځ د نصرالله د مړینې په مناسبت په یو پیغام کې لیکلي، چې د «برید امر له نیویارک څخه صادر شوی او امریکایان نه شي کولای، چې له اسراییل سره د لاس نه لرلو په ویلو سره» ځان خلاص کړي.
هغه زیاته کړه: «الهي لاره هیڅکله له قوماندان او مشر پرته نه پاتې کیږي.»
د پزشکيان مرستيال محمد رضا عارف په يو جلا پيغام کې ادعا کړې، چې د نصرالله وژنه به «د اسراييل نسل تباه کړي.»
د طالبانو د امربالمعروف وزير په افغانستان کې د اسلامي هېوادونو د همکارۍ سازمان له عمومي مشر سره په لیدنه کې ويلي، چې «د امربالمعروف نوی قانون» د اسلامي شريعت نبوی حديثو او حنفي فقهې په چوکاټ کې جوړ شوی. خالد حنفي د محمد سعید الیاش څخه د دوه اړخیزه همکاريو هیله کړې ده.
د طالبانو د امربالمعروف وزارت د شنبې په ورځ په يوې خبرپاڼه کې د دغه وزارت د وزير خالد حنفي او په افغانستان کې د اسلامي هېوادونو د همکاريو سازمان عمومي مشر د لیدلو خبر ورکړی.
په اعلاميه کې راغلي، چې په ناسته کې خالد حنفي ټينګار کړی، چې «د اسلامي شريعت پلي کول د اسلامي نظام دنده او د افغاني ټولنې غوښتنه ده.»
نوموړي ويلي، چې په دې برخه کې به خپلو هڅو ته دوام ورکړي.
اعلاميه زياتوي، چې په افغانستان کې د اسلامي هېوادونو د همکاريو سازمان مشر د امربالمعروف نوی قانون د ټولنې د اصلاح لپاره مثبت او ارزښتمن ارزولی.
تر اوسه محمد سعيد الیاش د دې ناستې د جزياتو په اړه څه نه دي ويلي.
خو د افغانانو په ګډون لسګونه نړیوالې ادارې او د بشري حقونو بسټونه بیا په تېرو درېیو کلونو کې طالبان په پراخه توګه د بشري حقونو په نقضولو تورن کړي.
د بیلابيلو بنسټونو، هېوادونو، ادارو او فعالانو له لوري د طالبانو د امربالمعروف نوي قانون له سختو نیوکو سره مخ شوی.
د افغانستان په تړاو د ملګرو ملتونو د امنيت شورا په غونډه کې هم د بېلابيلو هېوادونو استازو د طالبانو له لوري د امربالمعروف د نوي قانون، پر ښځو د بنديزونو او د وسله والو ډلو پر فعالیت اندېښنې ښودلې او د طالبانو دريځ يې غندلی وو.
د طالبانو تر واک لاندې د باختر خبري اژانس د شنبې په ورځ ملا هبت الله اخندزاده ته منسوب يو حکم خپور کړ چې په کې راغلي دي چې د دولتي ادارو مامورين مکلف دي چې له مراجعينو سره وګوري. په فرمان کې راغلي، که چارواکي له خلکو سره نه شي لیدلی، د دې کار لپاره دې استازی وټاکي.
په دغه فرمان کې د وزارتونو، سترې محکمې، ولایتي دفترونو، امنیه قوماندانانو، ولسوالیو او نورو دولتي ادارو له مسوولینو غوښتل شوي، چې د مراجعینو د اړتیا په صورت کې دې حاضر شي.
په حکم کې ټینګار شوی چې د دولتي ادارو له مسوولینو سره دې د مراجعینو د لیدو لپاره لازمې اسانتیاوې برابرې شي.
په همدې حال کې افغانستان انټرنشنل په وروستیو میاشتو کې ګڼې ویډیوګانې ترلاسه کړې، چې په کې خلکو د طالبانو تر واک لاندې دولتي ادارو کې د کار له سستوالي، ګڼې ګوڼې او ګډوډۍ شکایت کړی دی.
دغه راز په دولتي ادارو کې د طالبانو د کارکوونکو د ناوړه چلند او له مراجعو سره د غیر مسلکي چلند په اړه ډېر راپورونه خپاره شوي دي.
د اسراييلو د دفاع وزير يوف ګالانت وويل، د حزب الله مشر نصرالله يو ګواښ و.
هغه ټینګار وکړ چې د اسراییلو جګړه د لبنان له خلکو سره نه ده.
ګالانټ په یوه اعلامیه کې وویل: "هغه (نصرالله) د زرګونو اسراییلیانو او بهرنیو وګړو قاتل و." هغه د زرګونو اسراییلیانو او نورو اتباعو ژوند ته سمدستي ګواښ و. زه د لبنان خلکو ته وایم: زموږ جګړه له تاسو سره نه ده، د بدلون وخت راغلی دی.
د اسراییلو د دفاع وزیر د شنبې په ورځ د موساد له مشر او د اسراییلي پوځ له قوماندان سره ګوري.
شمالي وزيرستان کې د ماري پټروليم کمپنۍ چورلکه لوېدلې چې په کې ۶ کسان وژل شوي او اته نور ټپيان دي. د پاکستان امنیتي سرچینو د چورلکې د غورځېدو لامل "تخنیکي ستونزه" بللې ده. په دې چورلکه کې د درېو روسي پیلوټانو او عملې په ګډون ۱۴ سپرلۍ وې.
د پاکستان امنیتي سرچینو تایید کړې، چې چورلکه د ماري پټرولیم شرکت کرایه کړې وه او د پښتونخوا د شمالي وزیرستان په شوه سیمه کې غورځېدلې ده.
د دغې پېښې لامل د چورلکې د انجن خرابوالی بلل شوی دی.
د پاکستان امنیتي سرچینې وايي چې د تخریب نښې نه دي لیدل شوي.
سرچينې د شپږو تنو وژل کېدل تاييد کړي، خو تر اوسه د وژل شويو کسانو د هويت په اړه څه نه دي ويل شوي.
پاکستاني چارواکو ویلي چې د ژغورنې عملیات روان دي او نور جزیات به د پلټنو له بشپړیدو وروسته خپاره شي.
د اسراييل پوځ د شنبې په ورځ ويلي، چې د حزب الله مشر سید حسن نصرالله یې د بيروت په جنوبي څنډه کې، د دې ډلې پر مرکزي دفتر په يوه هوایي بريد کې وژلی دی.
حزب الله ډلې هم منلې چې مشر یې وژل شوی دی.
له څو لسيزو را هیسې د نصر الله په مشرۍ حزب الله ډله په سيمه ییز ځواک بدله شوې، چې په منځني ختيځ کې د تهران نفوذ ښيي.
د ایران سپاه پاسداران یا انقلابي ګارډ په ۱۹۸۲ کال کې دغه ډله جوړه کړه.
د نصرالله مړينه به د حزب الله ډلې ترڅنګ ایران ته هم لويه ضربه وي.
د اسراييل د پوځ ویاند پر اېکس پاڼه ليکلي: « د حزب الله ترهګريز سازمان مشر حسن الله يې له منځه وړی دی.»
هغه زیاته کړې، چې د حزب الله یو بل جګپوړی مشر علی کراکي هم وژل شوی دی.
د اسراییل پوځ په یوه جلا پوسټ کې ویلي: «حسن نصرالله نور نه شي کولای چې نړۍ ترور کړي.»
د حزب الله د قوماندې په مرکز باندې د جمعې د ورځې تر بريد وروسته د شنبې په ورځ نورو هوايي بریدونو د اسراییل او سخت دریځې وسله والې ډلې حزب الله ترمنځ جګړه نوره هم زیاته کړې.
دې شخړې دا اندیښنې زیاتې کړې، چې سیمه به په پراخه جګړه کې ښکیله شي.
د اسراییل پوځ ویلي، دقیق هوايي برید یې په داسې حال کې کړی، چې د حزب الله مشرتابه د بیروت په جنوب کې په داحیه کې د دوی په مرکزي دفتر کې غونډه کوله.
سید حسن نصرالله څوک دی؟
د ۶۴ کلن سید حسن نصرالله په مشرۍ حزب الله له اسراييل سره جګړې کړې او په سوريه کې يې په جګړو کې برخه اخيستې ده.
نوموړي د ولسمشر بشارالاسد په ګټه د قدرت د توازن په بدلولو کې مرسته کړې ده.
کارېزماتیک او هوښيار ستراتيژيسټ سید حسن نصرالله حزب الله د اسراییل په يوه دښمن بدله کړه.
نوموړي په ایران کې د شعيه مذهبي مشرانو او د حماس په څېر د فلسطيني وسله والو ډلو سره اتحاد ټينګ کړ.
لبناني شيعه پيروانو او په ټوله عربي او اسلامي نړۍ کې ميليونو کسانو نصرالله ته درناوی درلود.
په امريکا او لويديځ کې نصرالله او حزب الله ته د افراطيت او يو خطر په سترګه کتل کيږي.
سره له دې چې د نصرالله ډله په لبنان کې په واک کې شریکه ده، خو نوموړي په تیرو کلونو کې د اسراییل د وژنې له ویرې تر ډیره حده په پټه ژوند کاوه.
سید حسن نصرالله څنګه واک ته ورسید؟
نصرالله په ۱۹۶۰ کال کې د بيروت په بې وزله شمالي ښار شارشبوک کې په يوه بې وزله شيعه کورنۍ کې زېزېدلی او وروسته یې کورنۍ جنوبي لبنان ته تللې.
نوموړي د حزب الله له بنسټ ايښودلو مخکي د شيعه سیاسي او نيمه نظامي سازمان امل غورڅنګ سره یو ځای و.
حزب الله د ایران د سپاه پاسداران یا انقلابي ګارډ د غړو له خوا جوړه شوه، چې د ۱۹۸۲ کال په دوبي کې د نیواکګرو اسراییلي ځواکونو سره د مبارزې لپاره لبنان ته راغلي وو.
حزب الله لومړنۍ ډله وه، چې ایران یې ملاتړ وکړ او د خپل سياسي اسلام د صادرولو لپاره یې د يوې وسیلې په توګه وکاروله. له هغه وروسته چې ۳۹ کلن سید عباس موسوي د لبنان په جنوب کې د اسراییل په هوايي بريد کې ووژل شو، حزب الله د ۱۹۹۲ کال په فيبوري مياشت کې نصرالله د خپل سرمنشي په توګه وټاکه.
پنځه کاله وروسته امریکا حزب الله یو تروریستي سازمان اعلان کړ.
د نصرالله په مشرۍ حزب الله ته د غچ اخيستني د جګړې مشري ورکول سوه، چې په نتیجه کې یې له ۱۸ کلن اشغال وروسته په ۲۰۰۰ کال کې له جنوبي لبنان د اسرایيل ځواکونه ووتل.
د نصرالله مشر زوی هادي په ۱۹۹۷ کال کې د اسرایيل ځواکونو په وړاندي په جګړه کې ووژل شو.
په ۲۰۰۰ م کال کې د سويلي لبنان څخه د اسراييل ځواکونو له وتلو وروسته نصرالله په لبنان او ټوله عربي نړۍ کې د پام وړ حيثيت پيدا کړ او پیغامونه یې د حزب الله په راډيو او سټلايټ ټلويزيون کې خپرېدل.
دا دریځ هغه وخت نور هم پیاوړی شو کله، چې په ۲۰۰۶ کال کې حزب الله له اسراییلو سره د ۳۴ ورځنۍ جګړې په ترڅ کې مقابله وکړه.
کله چې په ۲۰۱۱ کې د سوریې کورنۍ جګړه پیل شوه، د حزب الله جنګیالي د بشار الاسد له ځواکونو سره یوځای شول.
په اوسنۍ جګړه کې د حسن نصرالله رول
یوه ورځ وروسته له هغه، چې د اکټوبر په اوومه د اسراییل او حماس ترمنځ جګړه پیل شوه، حزب الله د غزې په پوله کې د اسراییل پر پوځي پوستو بریدونه پیل کړل، چې د غزې لپاره د «بشپړ جبهې» په نوم یادیږي.
د جګړې پر مهال دوی استدلال کاوه، چې د حزب الله له پولې هاخوا بريدونو د اسرایيلي ځواکونو د دې ګام مخه نیولې، چې په غزه کې پر حماس تمرکز وکړي.
نصرالله ټينګار وکړ، چې حزب الله به په غزه کې د اوربند تر پیلېدو پوري پر اسراییل بريدونه وکړي.
اسراییل په شخړه کې یو نوی پړاو اعلان کړ، چې موخه یې له پولې د حزب الله شاته کول و، ترڅو د شمالي اسراییل څخه زرګونه بې ځایه شوي بیرته خپلو سیمو ته ستانه شي.
اسراییل د دې ډلې د لوړ پوړو پوځي قوماندانانو د وژلو لپاره بریدونه پیل کړل او د زرګونو مخابراتي وسایلو پر چاودلو هم تورن دی چې د حزب الله د غړو لخوا کارول کېدل.
په دې بريدونو کې ۳۷ کسان ووژل شول او په زرګونه نور ټپيان شول.
سرچینه: د بریتانیا انډیپېنډېنټ ورځپاڼه