حماس ویلي، چې په لبنان کې د دغې ډلې مشر فتح شریف ابوالامین د دغه هیواد په سوېل کې د اسراییل په یوه هوايي برید کې وژل شوی. دغې ډلې زیاته کړې، چې په دغه برید کې د شریف ابوالامین د کورنۍ ځینې غړي هم وژل شوي دي.
د حماس د خبرپاڼې له مخې، ابوالامین له خپلې مېرمنې او ماشومانو سره د لبنان په سوېل کې د اسراییل د هوايي بریدونو په ترڅ کې وژل شوی دی.
ابوالامین د غزې له تړانګې بهر د حماس د قوماندې شورا غړی و.
اسراییلي رسنیو ويلي، د حزبالله د اجرایوي شورا مشر هاشم صفي الدین تر حسن نصرالله هم خطرناک قوماندان دی. دغه خبرې وروسته له هغه کیږي، چې الحدث رسنۍ ویلي و، چې هغه د حسن نصرالله ځای ناستی ټاکل شوی.
حزبالله د حسن نصرالله د ځای ناستي د ټاکلو په اړه خپاره شوي خبرونه رد کړل.
تر دې مخکې الحدث رسنۍ خبر ورکړی و، چې د حزبالله د اجرایوي شورا مشر هاشم صفي الدین د دغې ډلې د نوي عمومي مشر په توګه ټاکل شوی.
د لبنان حزبالله د یوه بیان په خپرولو ویلي، چې د حسن نصرالله ځای ناستی به یوازې د دغې ډلې په رسمي خبرپاڼه اعلان شي.
د حزبالله په خبرپاڼه کې د صفي الدین نوم له یادولو پرته ویل شوي چې د حزبالله د نوي مشرتابه په توګه وړاندیز شوي ټول نومونه رد شوي دي.
د بادغیس او لغمان ولایتونو سیمه ییز طالب چارواکي وايي، چې یادو کسانو ته د تېرې ورځې او شپې د سختو ورښتونو له امله مرګ ژوبله اوښتې ده. د طالبانو په وینا د تېرې ورځې ورښتونو له امله د یادو ولایتونو ځینو اوسیدونکو ته مالي زیانونه هم اوښتي دي.
په بادغیس کې د طالبانو امنیه قوماندانۍ په خپله اېکس پاڼه لیکلي، چې تېره ورځ د یاد ولایت د بالامرغاب ولسوالۍ د جوی ګنج په سیمه کې یو تن د تندر غورځېدو له امله مړ شوی دی.
امنیه قوماندانۍ لیکلي، چې تېره ورځ د یاد ولایت په جوند، غورماچ او قادس ولسوالیو کې ګڼ او توپاني بارانونه شوي، خو په یادو ولسوالیو کې د مرګ ژوبلې او نورو زیانونو په اړه معلومات نه دي خپاره کړي.
همدارنګه په لغمان ولایت کې د طبیعي پېښو په وړاندې د چمتوالي مشر عبیدالله الکوزي د طالبانو تر واک لاندې باختر اژانس ته ویلي، چې د تېرې ورځې چټکو بادونو او باران له امله په بېلابېلو پېښو کې اوه تنه ټپیان شوي دي.
نوموړي ویلي، چې د چټکو بادونو او باران له امله د دیوالونو نړېدو او ونو چپه کېدو له امله دغه کسان ژوبل شوي.
ځايي طالبانو د یوه ټپي شوي کس روغتیايي حالت د اندېښنې وړ بللی دی.
همدارنګه په لغمان کې د طالبانو تر واک لاندې د پېښو په وړاندې د چمتوالي ادارې چارواکي وايي، چې د تېري شپې توپان د لغمان په نورو سیمو کې هم مالي او ځاني زیانونه اړولي دي.
دا په داسې حال کې ده، چې تېره ورځ د هوا پوهنې ادارې د افغانستان په ۱۸ ولایتونو کې د باران، تالندې، بریښنا، دوړو او سېلابونو راوتلو اټکل کړی و.
د پاکستان ایکسپریس ټریبیون ورځپاڼې د دوشنبه په ورځ راپور ورکړی، چې په روان میلادي کال کې یوازې په خیبرپښتونخوا ایالت کې ۳۳۷ تنه پوځي او ولسي وګړي د ترهګریزو بریدونو په پایله کې وژل شوي دي.
د ورځپاڼې د راپور له مخې، چې په یاده موده کې ۶۱۶ تنه په دغه ایالت ټپیان شوي هم دي.
د ایکسپریس ټریبیون د راپور له مخې، د نا امنیو ترڅنګ په خیبرپښتونخوا ایالت کې د تښتونو او باج اخیستلو شمېر هم ډير شوی دی.
ویل کیږي، چې په روان میلادي کال کې د تښتونو او باج اخیستلو ۹۸ پېښې هم شوې دي.
دغې ورځپاڼې د امنیتي چارواکو په حواله ویلي، چې د ټانک، لکي مروت، بنو، ډېره اسماعیل خان، شمالي او سوېلي وزیرستان کې سیمو کې د امنیتي ځواکونو فعالیت یوازې د دوی تر امنیتي پوستو پاتې دی.
ایکسپریس ټریبیون لیکلي، چې له مازدیګر وروسته له امنیتي پوستې بهر او په پوځي جامو کې ګرځېدل له جدي ګواښونو څخه ګڼل کیږي.
دغې پاکستاني رسنۍ لیکلي، چې په دې وروستیو کې د خیبرپښتونخوا په ایالت کې د باج اخیستلو لپاره تښتونې، د بانکونو د پيسو د لیږد پر موټرونو بریدونه، د موسسو د کارکوونکو او حکومتي کسانو تښتول، د مرستندویه بنسټونو پر کارکوونکو بریدونه او د پولیسو هدفي وژنې په یو عادي کار بدل شوي دي.
د ټریبیون په وینا، په خیبرپښتونخوا ایالت کې د ترهګریزو بریدونو ډیروالي او باج اخیستنو اقتصاد کمزوری کړی او له دغه ایالت څخه د پانګې د ایستلو لامل شوی.
په لبنان کې د اسراییل په بریدونو کې د یوې اونۍ په ترڅ کې د حزبالله اوه جګپوړي قوماندانان او سیاسي چارواکي وژل شوي دي.
د اسرایيل د پوځ لوى درستيز هرزي هالوي د يکشنبې په ورځ د (تلې اتمه) دې شمېرې ته په اشارې سره وويل: «حزبالله خپل سر له لاسه ورکړى او موږ بايد د حزبالله پر ضد خپلو زورورو بريدونو ته دوام ورکړو.»
حزبالله، د لبنان تر ټولو پیاوړی نظامي او سیاسي ځواک، اوس د خپلو مهمو غړو له لاسه ورکولو سره سخت زیانمن شوی، چې ډیری یې د ۱۹۸۰ لسیزې په لومړیو کې له جوړېدو راهیسې د حزبالله سره یوځای شوي.
حسن نصرالله چې په وژل شویو کسانو کې تر ټولو مخکښ و، له ۱۹۹۲ کال راهیسې له اسراییل سره په څو جګړو کې د دغې ډلې مشري کوله او په لبنان کې یې د یوه ځواکمن ځواک په بدلولو کې هم مهم رول و.
نبیل قاووق چې د شنبې په ورځ په یوه هوايي برید کې ووژل شو، د حزبالله د مرکزي شورا مرستیال و او د حسن نصرالله له احتمالي ځای ناستو څخه ګڼل کېده.
ابراهیم عقیل چې د رضوان د ځانګړو ځواکونو قوماندان او د حزبالله د تر ټولو سترې پوځي ادارې د جهادي شورا غړی و، یو بل وژل شوی قوماندان دی چې د ۱۹۸۳ کال په بیروت کې د امریکا سفارت په بمي چاودنو کې د خپل رول له امله له کلونو راهیسې د امریکا متحده ایالاتو ته د مطلوبو کسانو په نوملړ کې و.
احمد وهبه د رضوان د ځواکونو بل قوماندان چې څه د پاسه دوه لسیزې مخکې د دغې ډلې له رامینځته کیدو راهیسې د یادې ډلې په پراختیا کې مهم رول لوبولی و، د عقیل تر څنګ د بیروت په سوېل کې په یوه هوایي برید کې ووژل شو.
علي کرکي چې د حزبالله د سوېلي محاذ مشري یې کوله او د روانې جګړې مهار او لارښوونه یې کوله، هم د نصرالله تر څنګ ووژل شو.
محمد سرور د حزبالله د ډرون قطعې مشر یو بل وژل شوی قوماندان دی چې په وروستیو جګړو کې د حزبالله له لوري د بې پیلوټه الوتکو د کارولو له امله په دې ډله کې مهم ځای درلود.
ابراهیم قبایسي، د حزبالله د توغندیو د څانګې مشر، چې د اسراییل پوځ وايي، په ۲۰۰۰ کې د شمالي پولې په اوږدو کې د درېیو اسراییلي عسکرو د تښتولو او وژنې پلان جوړ او عملي کړی و، په دې اونۍ کې د وژل شویو اوو تنو په ډله کې وروستی هغه و.
خو د حزبالله لپاره له دې خونړۍ اونۍ څو میاشتې مخکې اسراییل په مهمو عملیاتو کې د اسماعیل هنیه له وژل کېدو څو ساعته مخکې د حزبالله تر ټولو مهم پوځي قوماندان فواد شیکر چې له کلونو راهیسې متحده ایالاتو ته مطلوب و، په نښه کړ.
په همدې حال کې د رضوان د روزنیزې قطعې قوماندان ابو حسن سمیر، د رضوان د ډلې یو جګپوړی قوماندان ویسام طویل، د ناصر قطعې قوماندان سامي عبدالله او د عزیز قطعې قوماندان محمد ناصر دواړه. د لبنان په سوېل کې د اسراییل د بریدونو په پایله کې وژل شوي دي.
په څلورو بېلابېلو امنیتي پېښو کې د ایران درې امنیتي عسکر وژل شوي دي. د ایرنا خبري اژانس د دوشنبې په ورځ د ایران په سرحد کې د ماککي هیرمند په سیمه کې د وسله والو کسانو سره په جګړه کې د یوه ایراني عسکر د وژل کېدو خبر ورکړی دی.
د دغه راپور له مخې، د سیستان او بلوچستان د راسک په ښار کې د وسله والو کسانو او ایراني سرحدي ځواکونو ترمنځ په جګړه کې یو بل امنیتي کس وژل شوی او دوه نور ټپیان دي.
د راپور د معلوماتو له مخې، په درېیمه پېښه کې چې د سیستان او بلوچستان په خاش ښار کې رامنځته شوېیو امنیتي عسکر د وسله والو لهخوا وژل شوی دی.
په ورته وخت کې، د سیستان او بلوچستان په ایرانشهر کې د ایراني پولیسو پر یوه پوسته د ډزو په پایله کې لږ ترلږه یو ایرانی عسکر ټپي شوی.
تر دې دمه، هیڅ یوه کس یا ډلې د دغو ځنځیرې بریدونو مسوولیت نه دی منلی.