د پښتون ژغورنې غورځنګ مشر منظور پښتین وايي، چې د دغه غورځنګ د مشرتابه غړی علي وزیر له زندانه تر خوشې کېدو وروسته بیا پاکستاني پولیسو نیولی دی. هغه وايي، پولیسو علي وزیر د پنجاب د سر وزیرې مریم نواز په امر نیولی دی.
د پښتون ژغورنې غورځنګ مشر منظور پښتین نن سې شنبه د (تلې ۱۰مه) په خپله ایکس پاڼه لیکلي چې په دې وروستیو کې د دغه غورځنګ د مشرتابه د غړي علي وزیر له زنداني کېدو وروسته څو ځلې له زندانه د راخلاصېدو ضمانت منل شوی خو تر خلاصېدو وروسته یې بیا پاکستاني پولیس نیسي او بل زندان ته یې بیايي.علي وزیر تېر ماښام دوشنبه د پاکستان په راولپینډۍ کې له اډیاله زندانه را خوشی او بېرته پولیسو نیولی او بل زندان ته یې بیولی دی.منظور پښتین زیاتوي چې: «علي وزیر د پنجاب د سر وزیرې مریم نواز په امر نیول کیږي او پرته له دې چې د زنداني کېدو لامل یې معلوم وي، بېرته بل زندان ته اچول کیږي.»د پښتون ژغورنې غورځنګ مشر د پنجاب سر وزیره تورنه کړه چې له پښتنو سره زیاتی کوي او دوی ته د خپلو حقونو ترلاسه کولو په برخه کې ستونزې جوړوي.: «مریم نواز د پاکستاني پوځ په غوښتنه دریم ځل علي وزیر نیولی او زنداني کړی.»شنونکي وايي، د پاکستاني پولیسو له لوري د پښتون ژغورنې غورځنګ د مهمو غړو نیولو او زنداني کولو موخه د دغه غورځنګ له لوري د پښتنو جوړېدونکي لویې قومي جرګې ته خنډونه جوړول دي.نږدې درې میاشتې وړاندې د پښتون ژغورنې غورځنګ مخکښ غړي ګیلهمن وزیر د جنازې مراسمو پر مهال د دغه غورځنګ مشر منظور پښتین اعلان وکړ، چې د روان ۲۰۲۴ کال د اکتوبر په ۱۱م به پر پښتنو د روان ظلم او زیاتي د رابرسیره کولو او د دوی له حقونو د دفاع په موخه د پښتنو لویه قومي جرګه رابولي او له هغه وروسته به خپل دریځ اعلانوي.په دې وروستیو کې د پښتون ژغورنې غورځنګ ځینو غړو ویلي، چې منظور پښتین ته هم امنیتي ګواښونه شوي او هغه د ځینو نا څرګندو وسله والو له لوري څارل کیږي.
په زرګونو بې ځایه شوي فلسطینیان د سې شنبې په ورځ د غزې د سویلي ښار خان یونس په کنډوالو کې خپلو کورونو ته وروسته له هغه راستانه شول چې اسراییلي ځواکونو هلته د یوې اونۍ اوږد یرغل پای ته ورساوه، چې د دوی په وینا هدف یې د اسلامي وسله والې ډلې حماس د بیا تنظیمیدو مخنیوی و.
فلسطینیان د غزې په سویل کې د خان یونس په سیمه کې د اسراییل ځواکونو له وتلو وروسته خپلو کورونو ته د بیرته راستنیدو په حال کې دي.
د غزې په سویل کې د خان یونس په سیمه کې یو فلسطینی پلار خپل ماشوم له ځانه سره وړي. فلسطینیان د خان یونس ختیځ سیمو ته وروسته له هغه د راستنېدو په حال کې دي چې اسراییلي ځواکونو دغه سیمه پریښې ده.
تیر کال د اکټوبر پر اومه پر اسراییل د حماس له برید وروسته، اسراییلي ځواکونو پر غزې پراخ هوايي او ځمکني بریدونه پیل کړل، چې په پایله کې یې تر ۴۱ زرو ډیر کسان وژل شوي او شاوخوا دوه میلیونه کسان بې ځایه شوي دي.
پر اسراییل د حماس برید کې ۱۲۰۰ کسان وژل شوي وو.
د هند سره د نیپال پر پوله د دوه ورځو پرله پسې بارانونو په پایله کې لږ تر لږه ۱۹۲ کسان مړه شوي او ۳۲ لا تر اوسه لادرکه دي.
نیپالي چارواکو وویل، چې د بنګله دېش په شمالي سیمو کې چې د نیپال څخه د هند د خاورې د یوې نرۍ برخې په وسیله بیله شوې، د سختو بارانونو او د سېلابونو د راوتلو له امله له ۱۰۰ زرو څخه ډېر خلک بند پاتې دي.
د کتمندو په دره کې چېرې چې څلور میلیونه خلک اوسیږي او د نیپال پلازمېنه ده، د ۵۶ کسانو مړینه تایید شوې ده.
دغې سیمې په وروستیو کلونو کې تر ټولو ناوړه ویجاړتیا لیدلې چیرې چې د سېلابونو له امله کورونه، روغتونونه، سړکونه، پلونه او بازارونه ویجاړ شوي دي.
د کابینې یو لوړ پوړی وزیر او ویاند پرتوي سبا ګورنګ وویل، چې حکومت د زیانونو او د بیارغونې لګښت ارزوي.
د ښاري پلان جوړونې کارپوه سوریا راج اچاریا وویل، چې په کټمندو کې د ښاري پلان څخه بهر جوړ شویو کورونو او ودانیو د ویجاړي کچه پورته کړې ده.
هغه وويل: "د سيندونو غاړې د خلکو له خوا د کورونو جوړولو لپاره غصب شوي؛ خو دغه کورونو کې د انجینرۍ اوصول په پام کې نه دي نیول شوي او نقشه یې له ښاري پلان سره برابره نه ده."