د هند د بهرنیو چارو وزیر وایي، د « اسیایي ناټو» له نسخې سره چې د جاپان نوي لومړي وزیر وړاندیز کړې، موافق نه دی. د رویټرز خبري اژانس د رپوټ له مخې، سوباهمانیام جې شنکر د واشنګټن په کارنیګي بنسټ کې د خبرو پرمهال وویل، چې هند دغسې ستراتیژیک څه په ذهن کې نه لري.
د جي شنکر په باور، هند او جاپان له امریکا او اسټرالیا سره په ګډه د هغې ډلې غړي دي، چې له چین سره د انډول ساتلو لپاره جوړه شوې ده.
جی شنکر وايي، نوی ډیلی له امنیتي ګواښونو سره د مقابلې په موخه له خپلو ملګرو هېوادونو سره د لا ژورو او نږدې اړیکو په لټه کې دی.
د نوموړي خبرې د جاپان د نوي لومړي وزیر شیګرو ایشیبا پرونیو څرګندونو ته وې چې د اسیايي ناټو د جوړولو غوښتنه یې وکړه.
هغه دا هم وویل، چې غواړي جاپاني سرتېري د امریکا خاوره کې ځای پر ځیا شي او د چین، روسیې او شمالي کوریا په څېر د خپلو اټومي ګاونډیانو د مخنیوي لپاره توکیو د واشنګټن پر اټومي وسلو شریک کنټرول ولري.
نوموړی وايي، دا ګام به چین په اسیا کې د وسلې له کارولو منع کړي، خو امریکا یې دا نظر رد کړی دی.
له دې سره ټاکل شوې په نږدې ورځو کې د جاپان، اسټرالیا او نیوزیلنډ هېوادونو استازي د لومړي ځل لپاره په بلجیم کې د ناټو په غونډه کې ګډون وکړي.
په ورته وخت کې د ناټو نوي سرمنشي مارک روته ویلي، چې دغه سازمان له اسیايي هېوادونو سره د همکاریو د ډېرولو په هڅه کې دی.
پښتین وايي، پولیسو خیمو ته اور هم ورته کړی او ځینې توکي یې له ځانه سره وړي دي.
د پښتون ژغورنې غورځنګ مشر منظور پښتین پر خپله ایکس پاڼه نن چهارشنبه د (تلې ۱۱مه) لیکلي، چې د شپې ناوخته پېښور ښار ته څېرمه د خیبر په جمرود سیمه کې د اکتوبر ۱۱ مې نیټې راتلونکي قامي جرګې پر خیمو او هلته د پي ټي ایم پر غړو د پيښور پولیسو برید کړی چې ځینې کسان ټپیان او یو شمیر خیمې سوځول شوې دي.
پښتین وايي، د پېښور پولیسو د جرګې پر خیمو ډزې کړې، اوښکې بهونکی ګاز یې پرې شیندلی او خیمې یې ړنګې کړې او ځينو ته یې اور ورته کړی.
منظور پښتین زیاتوي، چې ځينې ملګري یې ټپیان دي خو شمېر یې نه دی ښودلی.
هغه وايي، د پولیسو تر برید وروسته ځايي خلکو ځانونه میدان ته رسولي وو، او د امنیتي ځواکونو مخه یې نیولې وه.
منظور پښتین په ټولو پښتنو غږ کړی چې په خیبر کې د جرګې ځای ته ځانونه ورسوي: «په ټولو پښتنو ځوانانو مې غږ دی چې نن د ننګ او غیرت ورځ ده، د اړتیا وړ له سامانونو او بسترو سره د جرګې ځای ته راشئ، که د نړۍ ټول طاقتونه هم د جرګې ناکامولو لپاره راټول شي، د الله تعالي په فضل سره به پښتانه بیا هم خپله جرګه پرمخ وړي.»
د پښتون ژغورنې غورځنګ مشر وویل، پولیسو د دوی یو ناروغ ملګری هم له ځانه سره وړی دی.
د پېښې په سیمه کې د جمرود پولیس وايي، چې دوی په دې نه پوهیږي چې ولې دغه خیمې ړنګې او د جرګې مخه نیول کیږي.
د جمرود پولیسو افغانستان انټرنشنل پښتو ته ویلي، چې دوی دغه کار نه دی کړی او د جرګې ځای ته تېره شپه له پېښوره پولیس راغلي وو، خو د پېښور پولیس په دې اړه له خبرو کولو ډډه کوي.
نږدې درې میاشتې وړاندې د پښتون ژغورنې غورځنګ مخکښ غړي ګیلهمن وزیر د جنازې مراسمو پر مهال د دغه غورځنګ مشر منظور پښتین اعلان وکړ، چې د روان ۲۰۲۴ کال د اکتوبر په ۱۱م به پر پښتنو د روان ظلم او زیاتي د رابرسیره کولو او د دوی له حقونو د دفاع په موخه د پښتنو لویه قومي جرګه رابولي او له هغه وروسته به خپل دریځ اعلانوي. په دې وروستیو کې د پښتون ژغورنې غورځنګ ځینو غړو ویلي، چې منظور پښتین ته هم امنیتي ګواښونه شوي او هغه د ځینو نا څرګندو وسله والو له لوري څارل کیږي.
په زرګونو بې ځایه شوي فلسطینیان د سې شنبې په ورځ د غزې د سویلي ښار خان یونس په کنډوالو کې خپلو کورونو ته وروسته له هغه راستانه شول چې اسراییلي ځواکونو هلته د یوې اونۍ اوږد یرغل پای ته ورساوه، چې د دوی په وینا هدف یې د اسلامي وسله والې ډلې حماس د بیا تنظیمیدو مخنیوی و.
فلسطینیان د غزې په سویل کې د خان یونس په سیمه کې د اسراییل ځواکونو له وتلو وروسته خپلو کورونو ته د بیرته راستنیدو په حال کې دي.
د غزې په سویل کې د خان یونس په سیمه کې یو فلسطینی پلار خپل ماشوم له ځانه سره وړي. فلسطینیان د خان یونس ختیځ سیمو ته وروسته له هغه د راستنېدو په حال کې دي چې اسراییلي ځواکونو دغه سیمه پریښې ده.
تیر کال د اکټوبر پر اومه پر اسراییل د حماس له برید وروسته، اسراییلي ځواکونو پر غزې پراخ هوايي او ځمکني بریدونه پیل کړل، چې په پایله کې یې تر ۴۱ زرو ډیر کسان وژل شوي او شاوخوا دوه میلیونه کسان بې ځایه شوي دي.
پر اسراییل د حماس برید کې ۱۲۰۰ کسان وژل شوي وو.
