د پاکستان کرېکټ بورډ ويلي، چې د انګلينډ لوبډله د درېيو ټېسټ لوبو د تر سره کولو لپاره پاکستان ته رسېدلې ده. د کرېکټ بورډ په خبره، چې انګلینډ لوبډله به د راتلونکې جمعې په ورځ د سياليو لپاره تمرينات پیل کړي.
د پاکستان کرېکټ بورډ د چهارشنبې په ورځ په يوې اعلامیه کې ویلي، چې د بین سټوکس په لوبډلمشرۍ انګلينډ لوبډله به تر دوه ورځني استراحت وروسته د سياليو لپاره تياری ونيسي.
بورډ ویلي، چې د پاکستان او انګلستان تر منځ به لومړۍ او دويمه ټیسټ لوبه په ملتان کرېکټ لوبغالي کې د روانې میاشتې په اوومه نېټه پیل او تر ۱۹ مې نېټې به دوام وکړي.
د پاکستان کرېکټ بورډ د معلوماتو له مخې؛ د کرېکټ درېیمه ټېسټ سيالۍ به د اکټوبر مياشتي له ۲۴ څخه تر ۲۸ نېټې د راولپڼډۍ په کرېکټ لوبغالي کې تر سره شي.
پاکستان کرېکټ لوبډله لا له وړاندې دغو سياليو ته په تیاريو او تمريناتو بوخته ده.
