د خیبر پښتونخوا پولیسو د پښتون ژغورنې غورځنګ له خوا د جوړېدونکې قامي جرګې/عدالت پر تنظیموونکو هوايي ډزې کړې او ټول هغه توکي، خیمې او بسترې یې سوځولې، چې د دې جرګې لپاره په خیبر ولسوالۍ کې د جرګې د جوړېدو ځای ته لېږدول شوي وو.
د پښتون ژغورنې غورځنګ مشر منظور پشتین د دې پېښې په غبرګون کې پر خپل اېکس لیکلي، چې « د پښتون وطن لپاره اوس مستقیمه د اور اچونې پالیسي ده».
د خیبر پښتونخوا پولیسو تېره شپه هم د دې جرګې د جوړېدو پرځای برید کړی و.
د پښتون ژغورنې غورځنګ غړي وايي، چې د خیبر پښتونخوا پولیسو د جرګې په ځای کې یو شمېر وسایل له منځه وړي او ځینې یې له ځانونو سره وړي دي.
د خیبر ولسوالۍ یوه سیاسي فعال خان ولي افریدي ددې سیمې پر ولسونو او خپلو پلویانو غږ کړی، چې بریدګر پولیس محاصره کړي.
هغه وايي: «له قومي مشرانو سره له سلامشورو وروسته به په جمرود او باړه سیمو کې د پرلتونو غږ وکړو».
د خیبر پښتونخوا د ایالتي اسامبلې غړي احمد کنډي په یوه اعلامیه کې د پولیسو دغه ګام د بشري حقونو او ازادیو خلاف ګڼلی او د دغه ایالت له اسامبلې یې غوښتي چې دا موضوع په خپله اجنډا کې ونیسي.
د پښتون ژغورنې غورځنګ پتېیلې چې د اکتوبر پر ۱۱مه نېټه په خیبر ولسوالۍ کې د پښتنو قومي جرګه یا عدالت را وغواړي او په پاکستان کې د میشتو پښتنو پر ستونزو، ترهګرۍ، ورکو شویو خلکو او د پاکستان د پوځ او امنیتي ادارو پر چلند خبرې وکړي.
د پښتونخوا ایالتي حکومت او سیاسي ګوندونو او مشرانو، چې په دې جرګه کې د ګډون بلنه ور کړل شوې، تر اوسه پرې دې پېښه غبرګون نه دی ښودلی.
