په افغانستان کې د ملګرو ملتونو د سرمنشي استازې او د یوناما مشرې روزا اوتنبایوا د اندېښنې په څرګندولو سره ویلي، چې په افغانستان کې ښځینه بندیانې په زندانونو کې حقوقي خدمتونو ته لاسرسی نه لري.
نوموړې دغه څرګندونې په کابل کې د طالبانو د زندانونو چارو له مشر یوسف مستري سره د لېدنې پرمهال کړې دي.
په کابل کې د یوناما دفتر په اېکس پاڼه د یوې خبرپاڼې په خپرولو سره لیکلي، چې د طالبانو لهخوا د دوی په توقیف ځایونو د ملګرو ملتونو د بشري حقونو د ډلو د لاسرسي په برخه کې د دوامداره همکارۍ او خبرو اتروهرکلی کوي.
اغلې اوتنبایوا ویلي:« د بشري حقونو څارنه او راپور ورکول په افغانستان کې زموږ د امنیت شورا لهخوا د ټاکل شوي کار یوه اړینه برخه ده.»
د ملګرو ملتونو استازې او د یوناما مشرې روزا اوتنبایوا وویل:« ټول بندیان بنسټیز حقونه لري او موږ باید ډاډ ترلاسه کړو، چې دغو حقونو ته په بشپړ ډول درناوی کېږي.»
اغلې اوتونبایوا په دغو خبرو کې د زیان منونکو بندیانو په ځانګړې توګه د ښځو لپاره د کافي حقوقي مرستو د خدمتونو د نشتوالي ترڅنګ، د زندان د خدمتونو د لا مسلکي کولو اړتیا په ګډون ګڼې اندېښنې راپورته کړې.
په خبرپاڼه کې دا رنګه راغلي، چې اغلې اوتنبایوا د کابل د څرخي پله له زندانه هم لیدنه وکړه.
له بلې خوا د طالبانو پلاوي په دغې لیدنه کې اغلې اوتنبایوا ته ویلي، چې په څرخي پله زندان کې تر ۵۰۰۰ ډېر کسان بندیان دي او په دغه زندان کې د بندیانو شمېر مخ په ډېرېدو دی، چې هره ورځ د خوشې کېدو پرتله ډېر نور بندیان په کې منل کېږي.
اوتونبایوا په خپلو خبرو کې وویل:« موږ باید د ډېر زنداني کېدو له اصلي لاملونو سره د مبارزې په هڅو هم تمرکز وکړو.»
د ملګرو ملتونو د سرمنشي ځانګړې استازې خبرداری ورکړی، چې له مخ په زیاتېدونکو بشري اړتیاوو سره، سره له افغانستان سره د نړۍوالو مرستندویانو مرستې په لویه کچه د ښځو پر وړاندې د طالبانو د پرله پسې محدودیتونو او د امر بالمعروف د وروستي قانون د توشیح له امله کمې شوې دي.
یوناما غواړي، توقیف ځایونو ته د نامحدوده لاسرسي لپاره د طالبانو د کورنیو چارو وزارت او د استخباراتو عمومي ریاست چارواکو سره هم خپلو خبرو ته دوام ورکړي.
