طالبانو په تخار کې خبریالانو او رسنوالو ته امر کړې چې د انځورونو له اخیستو ډډه وکړي
سیمه ییزې سرچینې وايي، طالب چارواکو ورته امر کړی چې انځورونه او ویډیوګانې دې نه اخلي او ټینګار کوي چې ټلویزیونونه باید په راډیوګانو بدل شي.
سیمه ییزې سرچینې وايي، طالب چارواکو ورته امر کړی چې انځورونه او ویډیوګانې دې نه اخلي او ټینګار کوي چې ټلویزیونونه باید په راډیوګانو بدل شي.
طالبان دا ګام د امر بالمعروف او نهی عن المنکر نوي قانون د پليتابه په اډانه کې، چې په دې وروستیو کې نافذ شوی، اخلي. د دغه قانون له مخې، د ژوندیو څیزونو عکس او فلم اخستل منع دي.
سرچينې وايي، دغه ناسته د يکشنبې په ورځ (د تلې پر ٢٢مه)، په تخار کې د طالبانو د اطلاعاتو او فرهنګ د رييس په دفتر کې د امر بالمعروف او استخباراتي مسوولانو په حضور کې شوې ده.
د سرچينې د معلوماتو له مخې، د دغه امر په غبرګون کې د ځينو ټلویزیونونو مسوولانو استدلال وکړ، چې دوى اړ دي خپلې خپرونې په ويډیويي بڼه توليد او خپرې کړي، خو طالبانو ټينګار کړى، چې ټلوېزيونونه دې په راډيوګانو بدل کړي او يا دې خپل فعاليتونه بیخي ودروي.
د طالبانو د استخباراتو د رسنیو مسوول برکت الله برکت په دې غونډه کې خبرداری ورکړی، چې که څوک له دغه امر نه سر وغړوي، له قانوني چلند سره به مخ شي.
نوموړي ویلي، چې د طالبانو د مشر د حکم پلیتابه لپاره به ټولې شونې لارې چارې وکاروي.
