د ازادو رزمي لوبو او په سویډن کې د اې ايف اين «AFN» سازمان اتل افغان لوبغاړی سخي قنبري څلور ورځي وروسته د شنبې په ورځ (د تلې ۲۸ مه) باید د دې سازمان په سياليو کې د خپل اتلولۍ له کمربند څخه دفاع وکړي. د هغه سيال اریک روانو دی، چې د دې سياليو ډېره تجربه لري.
له دې وړاندې قنبري د ۱۴۰۳ کال د چنګاښ په نهمه خپل پولنډي سیال ته ماتې ورکړه او د اتلولۍ له کمربند یې دفاع وکړه.
قنبري په سویډن کې د «ال سټارز فایټ نایټ» د ۶۵ کیلو ګرامه وزن په ۸م پړاو کې سیالي کوي.
نوموړی دا ځل له ګواتيمالا څخه د ۳۶ کلن تجريبه لرونکي لوبغاړي سره د سيالۍ ډګر ته کښته کيږي.
ايريک روانو د ازادو رزمي لوبو ۲۱ مسلکي ريکارډونه لري، چې ۱۶ سيالۍ يې ګټلي او په پنځو کې ماتې خوړلې.
له بلې خوا سخي قنبري په ازادو سیالیو کې یوازې شپږ ریکارډونه لري، چې پنځه سيالۍ يې ګټلې او په يوې کې يې ماتې خوړلې.
