طالبان: له ایران او پاکستانه ۲۸۰ کورنۍ بېرته هېواد ته راستنې شوې

د راپور له مخې، ‏ ۱۰ کورنۍ د تورخم له لارې، ۲۱ د کندهار د سپین بولدک له لارې، ۹۷ د نيمروز د ورېښمو پله له لارې او ۱۵۲ د هرات د اسلام کلا له لارې هېواد ته راستنې شوې دي.
راپور زیاتوي، چې ۱۶ کورنۍ خپلو سيمو ته لېږدول شوې او سلګونو کورنيو ته بیا مرستې وېشل شوې دي.
له بل پلوه د ملګرو ملتونو د بشري حقونو په شورا کې د افغانستان استازي ویلي، چې له ۲۰۲۱ کال راهیسې کابو ۸ مېلیونه افغانانو هېواد پرېښی او دغه ستونزه باید له ریښې حل شي.
نصیر احمد اندېشه پر اېکس پاڼه لیکلي، چې د افغانستان د کډوالو او بې ځایه شویو حالت د نړۍ یو له جدي ننګونو څخه دی.
تر دې وړاندې د کډوالۍ نړۍوال سازمان هم ویلي و، چې پر افغانستان د طالبانو له واکمنۍ وروسته شاوخوا اته مېلیونه افغانان له خپلې خاورې وتلي دي.
دغه سازمان زیاته کړې وه، چې یو مېلیون افغانانو اروپايي هېوادونو ته پناه وړې ده او ۸۵ سلنه یې ګاونډیو هېوادونو ته تللي دي.
بل خوا پاکستانۍ رسنیو هم په خپلو وروستیو راپورونو کې ویلي و، چې د سپټمبر له ۹مې نېټې څخه د اکټوبر تر ۷مې نیټې یې له دغه هېواده ۲۶۶۲۲ تنه افغان کډوال افغانستان ته استولي او دا لړۍ لا هم روانه ده.