د امریکا مرستیاله ولسمشره او د راتلونکو ولسمشریزو ټاکنو نومانده وايي، نوموړې د ټرمپ د ادعاوو په ځواب کې چمتو ده چې د خپلې هوښیارۍ ضریب یا ای کیو ازموینه ور کړي، خو په همدې ترڅ کې نوموړې خپل سیال ډونالډ ټرمپ هم په ورته ازموینې وننګاوه.
کمالا هرېس له سي بي ایس ټلویزیون سره مرکه کې وویل: « دا هغه څه دي چې ده غوښتي او زه فکر کوم چې نوموړی ډېر بې ثباته دی او د امریکا لپاره هیڅ پلان نه لري».
هرېس ددې خبرې د اثبات لپاره یو شمېر هغو کسانو ته اشاره وکړه چېد ټرمپ ترڅنګ ولاړ پاتې شوي او په همدې بنسټ یې وویل، چې «نوموړی د ولسمشرۍ وړ نه دی».
هرېس وویل: «دا له ما مه غواړئ، له هغو خلکو یې واورئ چې نوموړی [ټرمپ] له نږدې پېژني».
هغې وايي: «دا د ټرمپ له وروستیو دوو لویو درستیزانو واورئ، له جنرال جان کیلي یې واورئ او پخواني دوه د دفاع وزیران او د هغه د ملي امنیت پخوانی سلاکار او پخوانی مرستیال ولسمشر وغږوئ چې له ده سره یې په وروستیو کلونو کې کار کړی».
هرېس وايي، هغوی ویلي، چې ټرمپ باید ددویم ځل لپاره ولسمشر نه شي او بیا راتګ یې ګواښناک دی.
هرېس په دې وروستیو کې د ټرمپ خلاف څرګندونو، په ځانګړې توګه هغه ته د فاشیست خطاب کولو له امله تر نیوکو لاندې ده.
هرېس اې بي سي ته وویل، چې نوموړې د هرچا خلاف هر ډول سیاسي تاوتریخوالی غندي.
د اې بي سي د یکشنبې ورځې نظرپوښتنې ښيي چې ټرمپ او هرېس په ټولو ایالتونو کې د ګټې برابر ډګرونه لري، خو هرېس په ملي کچه په لوړ ځای کې ده.
هریس د خپلو ۱۰۰ لومړیو ورځو کاري پلان په اړه وویل چې غواړي د لګښتونو کمولو لکه کورونو، وړو دندو او د ماشومانو مالیاتي کریډیټ ته پام وکړي.
هغې د پولو امنیت ته هم اشاره وکړه، چې ددې په لومړیتوبونو کې به وي.
