د رویټرز او اېپسوس نظرپوښتنه: د ټرمپ پر وړاندې د هرېس مخکښتوب یو سلنه کم شوی دی
د اېپسوس او رويټرز په یوې تازه نظرپوښتنه کې راغلي، چې د ډيموکراټ ګوند نوماندې کمالا هرېس مخکښتوب د خپل سیال جمهوري غوښتونکو نوماند ډونالډ ټرمپ پر وړاندې یو سلنه کم شوی دی.
په دغې نظرپوښتنه کې ۴۴سلنه رای ورکوونکي له هرېس او ۴۳ سلنه بیا له ډونالډ ټرمپ څخه ملاتړ کوي.
د اېپسوس/رویټرز مخکینۍ نظرپوښتنه چې (د اکټوبر له ۱۶مې تر ۲۱مې) ترسره شوې وه د کمالا هرېس مخکښتوب پکې تر ټرمپ دوه سلنه زیات وو.
تمه کېږي، چې د امربکا ولسمشرېزې ټاکنې تر راتلونکو شپږو ورځو (د لړم په ۱۵مه) ترسره شي.
په دغې تازه نظرپوښتنه کې یو زر او ۱۵۰ کسانو ګډون لاره.
رویټرز لیکلي، چې ټرمپ په ځینو مسلو کې د هرېس پرتله د رای ورکوونکو له ډېر ملاتړه برخمن دی.
رویټرز خبري اژانس نن چهارشنبه (د لړم په ۹مه) لیکلي، چې د ټرمپ د اقتصادي او کارموندنې سیاستونو د رای ورکوونکو لهخوا ۴۷ سلنه او د هرېس بیا ۳۷ سلنه ملاتړ ترلاسه کړی دی.
د دغې نظرپوښتنې موندنې ښیي، چې د ۲۶سلنې ګډونوالو لپاره اقتصادي مسالې او کاري فرصتونو لومړیتوب لاره، ۲۴سلنه نورو ته د سیاسي تاوتریخوالي ته رسېدنه اړینه ده او ۱۸ سلنه نورو بیا د نوماندانو د کډوالۍ په برخه کې سیاستونه اړین بللي دي.
