امریکایان د سې شنبې ورځې ټاکنو ته شېبې شمېري

ځيني رایه ورکوونکي د ټاکنو د پایلو او له احتمالي بې ثباتۍ څخه وېره لري.
رویټرز خبري اژانس په خپل راپور کې لیکلي، چې د هغو اوو ایالتونو له ۵۰ اوسېدونکو سره یې خبرې کړي، چې په دې ټاکنو کې یې رایي کلیدي رول لري.
د راپور له مخې، دوی له ځینو داسې کسانو سره مخ شوي دي، چې د خپلې د خوښې نوماند د نه بریالیتوب په اړه اندېښمن دي.
دوی وایي، چې ځیني مرکه کوونکي اندېښنه لري، چې سیاسي وېش به لا پسې ژور شي.
اخوا، یو شمېر نورو امریکایان له روان سیاسي وضعیت څخه ستړي شوي دي.
یوه ۶۸ کلنه تقاعد شوې ګرافیک ډیزاینره چې پلان لري د ټرمپ لپاره رایه ورکړي وایي، چې له روان کړکېچ، د دوامداره پوښتنو او د کمپاین له اعلانونو څخه چې په پنسیلوانیا کې یې هر وخت مخې ته راځي ستړې شوې او غواړي له دې ټولو څخه لرې پاتې شي.
ځیني نور بیا هیله لري، چې د دې ټاکنو پایلې ژر روښانه شي ترڅو په امریکا او دغه راز په نړۍ کې روان کړکېچ لا ژور نه شي.
ټاکل شوې، چې د سې شنبه په ورځ د امریکا ولسمشریزې ټاکنې د نوماندانو ترمنځ د وروستیو اونیو د سختو ټاکنیزو سیالیو وروسته ترسره شي.‌
د رویټرز د راپور له مخې، د امریکا د ۲۰۲۴ کال په ټاکنو کې تر اوسه څه باندې ۷۸ ميليونو خلکو په مخکې له مخکې رایې ورکړي.