د هرېس ټاکنیزه ژمنه: زه به په خپل ټول توان د غزې جګړه پای ته ورسوم

خو په دغه ایالت کې ځینې عرب-امریکایان او مسلمانان په غزه کې له حماس سره په جګړه کې له اسراییلو سره د بایډن او هرېس د ادارې له بشپړ ملاتړ څخه ناخوښه دي.

هرېس په خپله وروستۍ کمپایني غونډه کې وايي: "د ولسمشرې په توګه، زه به د غزې د جګړې د پای ته رسولو، د یرغمل شویو د خوشې کولو، د غزې د خلکو د کړاوونو د کمولو، د اسراییلو د امنیت د تامین او د فلسطین د خلکو د عزت او ازادۍ د حقونو د ورکولو لپاره ټول هغه څه وکړم چې په توان کې یې لرم."

هغې د میشیګن ایالت په پوهنتون کې د وینا پر مهال هم ټینګار وکړ، چې غواړي "په سیاست کې داسې یو نوی دور پیل کړي د ویرې او ویش پر اساس نه وي."

نوموړې ټرمپ ته له اشارې پرته وویل: "امریکا د نوي پیل لپاره چمتو ده. په داسې طریقه چې موږ خپل هیوادوال د دښمن په توګه نه، بلکې د ګاونډیانو په توګه وګورو."

د یوې وروستۍ نظرپوښتنې پایلې ښیې، چې په میشیګن کې ځینې عرب او مسلمان رای ورکونکي د زرغون ګوند نوماند جېل سټاین ملاتړ کوي.

په دې برخه کې، ډیموکراټانو په ټولنیزو رسنیو کې پراخ کمپاینونه پیل کړي ترڅو رایه ورکوونکي د سټاین او کارنیل ویسټ، چې یو خپلواک کاندید او د اسراییلو منتقد دي، له ملاتړه په شا کړي.