د امریکا د عدلیې وزارت له وروستیو انتخاباتو مخکې د ډونالډ ټرمپ د وژلو لپاره د ایران د حکومت د دسیسې د شنډولو په تړاو د جنايي تورونو د ثبتولو خبر ورکړ.
د منهاټن په فدرالي محکمه کې د ثبت شوي شکایت له مخې، د سپاه پاسداران یو چارواکي په سپتمبر کې یو چا ته امر کړی و، چې د ټرمپ تر نظر لاندې ولري او هغه ووژني.
د هند لومړي وزیر، د کشمیر د ځینو نویو قانون جوړونکو له غوښتنې سره چې د سیمې د نسبي خپلواکۍ د بیرته راستنولو غوښتنه یې کړې، مخالفت کړی دی. نرېندرا مودي وویل، چې دې سیمې ته به نسبي خپلواکي نه راستنیږي، په قانوني او اجرایي توګه دا کار شونی نه دی.
د هند د اساسي قانون د ۳۷۰مې مادې ځینو برخو د جمو او کشمیر خلکو ته ځانګړي امتیازات ورکړي وو، مګر د مودي حکومت په ۲۰۱۹ کال کې دا قانون بدل کړ او د جمو او کشمیر سیمې ځانګړي امتیازات یې لغوه کړل. د هند سترې محکمې دا پرېکړه په وروستیو کلونو کې تایید کړه.
په دې وروستیو کې، په کشمیر کې یو شمېر نوي ټاکل شوي قانون جوړونکو یو پرېکړه لیک تصویب کړ چې د هند د اساسي قانون د ۳۷۰ مې مادې پراساس دې سیمې ته د نسبي خپلواکۍ د بیا راستنولو غوښتنه کوي.
مګر، مودي د خپل دولت له پرېکړي چې په ۲۰۱۹ کال کې یې د اساسي قانون په ۳۷۰ ماده کې تغییرات راوستي و، دفاع وکړه.
نرېندرا مودي د هند په لویدیځ مهاراشترا ایالت کې په یوه غونډه کې وویل: «یوازې د بابا صاحب امبدکار اساسي قانون به په کشمیر کې پلي شي. د نړۍ هېڅ ځواک نشي کولی په کشمیر کې ۳۷۰مه ماده بیا پلي کړي.»
د دې مادې له مخې چې په ۱۹۵۹ کې تصویب شوې، جمو او کشمیر د قانون له نظره ځانګړی وضعیت درلود او تر هغه چې د هند حکومت او کشمیري چارواکو موافقه نه وه، د هند ډېری قوانین په دې سیمه کې نه پلي کیدل.
۳۷۰مه ماده تر ۲۰۱۹ کال پورې د اعتبار وړ وه، مګر د نرېندرا مودي په مشرۍ د هند حکومت پریکړه وکړه چې دا ماده لغوه کړي او د کشمیر نسبي خپلواکي له منځه یوسي.
د هوا ککړتیا د زیاتېدو له امله د پاکستان په تر ټولو ستره صوبه پنجاب کې نن د پارک او ژوبڼ په ګډون ډېری عامه ځایونو ته پر تګ بندیز ولګېد.
ځايي چارواکي حکومت وايي د دې صوبې په ختیځه برخه کې د ککړې هوا د زیاتېدو له امله د خلکو د روغتیا ساتلو لپاره دا بندیز لګوي.
د پنجاب مرکز لاهور دا اونۍ سخته هوا او تور لوګي کې ډوب دی.
سویس کې د هوا ککړتیا ادارې د ازموینې له مخې لاهور اوس د نړۍ تر ټولو ککړ ښار دی.
لاهور تر کراچۍ وروسته د پاکستان دویم تر ټولو ستر ښار دی.
تېره میاشت په دغه ښار کې د سخت لوګي له امله د ښوونځي ماشومان د راتلونکې جنورۍ تر پای په پرانیستي چاپېریال کې له لوبو او ورزش منع شول.
په ګاډو او کمپنیو کې د کم کیفیته سونتوکو د کارېدو له امله په دغه ۱۴ میلیوني ښار کې د ژمي په موسم کې هوا ډېره چټله وي.
د پاکستان لاهور ښار کې تېر کال هم هوا ډېره ککړه وه، چې له امله یې یو ځل چارواکو پر دغه ښار مصنوعي باران وکړ.
د روغتیا نړیوال سازمان په خبره، ککړه هوا د مغزي سکتې، زړه او سږو د ناروغیو په ګډون د مختلفو ناروغیو لامل کېږي.
د ملګرو ملتونو ماشوم ملاتړې اداره یا یونیسېف وايي، سوېلي اسیا کې له شپږ سوو مېلیونو ډېر ماشومان د لوړې کچې ککړې هوا سره مخ دي.
د افغانستان د ژغورنې لپاره د ملي مقاومت عالي شورا اعلان وکړ چې هیله لري د امریکا نوی حکومت به د افغانستان په اړه په خپلو سیاستونو کې اصلاحات راولي. دغې شورا په یوه خبرپاڼه کې د امریکا له نوي ولسمشر ډونالډ ټرمپ غوښتي، چې د افغانستان کړکېچ پای ته ورسوي.
د افغانستان د ژغورنې لپاره د ملي مقاومت د عالي شورا په خبرپاڼه کې چې د جمعې په ورځ «د لړم١٧مه» خپره شوې راغلي: «لکه څنګه چې ښاغلي ټرمپ ژمنه کړې ده، تمه ده چې د نړۍ په بېلابېلو هېوادونو کې روانې ویجاړونکې جګړې او په افغانستان کې موجوده کړکېچ پای ته ورسېږي.»
د افغانستان د ژغورنې لپاره د ملي مقاومت شورا له جهادي مشرانو، پخوانیو حکومتي چارواکو او د افغانستان د ځینو مهمو ګوندونو له مشرانو جوړه ده.
دا شورا د طالبانو له واکمنۍ وروسته په بهر کې جوړه شوه او غړي یې ټول له افغانستانه بهر دي.
عبدالرشید دوستم، عطا محمد نور، محمد محقق، عبدالرب رسول سیاف او سرور دانش د دې سیاسي جریان لوړ پوړي غړي دي.
د مقاومت شورا هیله څرګنده کړې، چې د امریکا د نوي دولت به د افغانستان په اړه په سیاستونو اصلاحات راولي او د ولسواکۍ او د یو قانوني حکومت د اړتیا په اړه به د افغانانو غوښتنې په پام کې ونیول شي.
د طالبانو پر ضد دغه حرکت له افغانستانه د امریکا وتل «ناورین راوړونکی او غیر پلان شوي» بللی او زیاته کړې یې ده، چې افغانستان د دوحې د ناکامې هوکړې له مخې طالبانو ته سپارل شوی دی.
د مقاومت عالي شورا ټینګار وکړ، چې دغه تړون افغانستان د ترورېزم او افراطیت په غېږ کې ډوب کړی او د تېر حکومت او د هېواد د امنیتي بنسټونو د نسکورېدو، له ټولو جوړښتونو څخه د ښځو د ایستلو، د پراخو بشري جنایتونو د کمېسیون او د میلونونو افغانانو بې ځایه کېدو لامل شوی دی.
دغه شورا همداراز د امریکا له نوي حکومت څخه هیله کوي، چې هغه عوامل چې د امریکا د حکومت تر نامه لاندې په افغانستان کې د روان کړکیچ لامل شوي په نښه کړي او ځواب یې ورکړي.
د مقاومت شورا هیله څرګنده کړې چې د امریکا نوی حکومت به د افغانستان په اړه په خپلو راتلونکو پرېکړو کې پر هغو خلکو تکیه وکړي چې بې پرې، عادلانه نظر لري او د افغانانو په اراده تکیه کوي.
د هند د بهرنیو چارو وزارت ویاند رندهیر جیسوال وايي د دغه هېواد استازي د اقتصادي اړیکو او بشري مرستو د پیاوړتیا لپاره له چابهار بندر د استفادې په اړه د خبرو لپاره کابل ته سفر کړی و. جیسوال وویل چې هندي پلاوي په کابل کې له طالب چارواکو او حامد کرزي سره لیدلي دي.
د هند د بهرنیو چارو وزارت ویاند رندهیر جیسوال د پنجشنبې په ورځ په ډیلي کې خبري کنفرانس ته د هندي پلاوي د سفر په اړه جزییات ورکړل.
د هند په بهرنیو چارو وزارت کې د پاکستان، افغانستان او ایران د څانګو مشر جي، پي، سینګ په دې وروستیو ورځو کې د یوه پلاوي په مشرۍ کابل ته سفر وکړ او له طالب چارواکو سره یې ولیدل.
د طالبانو د دفاع وزارت د چهار شنبې په ورځ په یوه خبرپاڼه کې لیکلي، چې دفاع وزیر یعقوب مجاهد له چي پي سینګ سره سره وکتل.
د طالبانو د بهرنیو چارو وزیر امیر خان متقي هم له جي پي سینګ سره په لیدنه کې ویلي، چې دا ډله له ډیلي سره د خپلو اړیکو د پراختیا تمه لري.
پخواني ولسمشر حامد کرزي هم په کابل کې له هندي پلاوي سره په لیدنه کې د افغانانو زدکړو ته د هند توجو او د دواړو هېوادونو تر منځه د سوداګرۍ پر پراختیا خبرې کړې دي.
د هند د بهرنیو چارو وزارت ویاند وايي، دغه پلاوي په کابل کې د هندي پلاوي د ناستو پر مهال له افغانستان سره د بشري مرستو او د چابهار بندر له لارې سوداګرۍ، صادراتو او وارداتو په برخه کې د افغانستان د سوداګریزې ټولنې له خوا د کار اخیستلو او نورو مسایلو په اړه خبرې کړې دي.
رندهیر جیسوال وویل چې افغانستان ته د بشردوستانه مرستو برابرول د هند د مرستو د پروګرامونو یوه مهمه برخه ده او ویې ویل چې دوی اوس هم افغانستان ته د غنمو څو چوپې لېږلې دي.
د ترکیې ولسمشر وايي، که د ډونالډ ټرمپ په مشرۍ د امریکا حکومت د مسلې حل غوره کړي، نو د اوکراین جګړه په اسانۍ ختمېدلی شي.
رجب طیب اردوغان زیاتوي، یوازې د خبرو او ډيپلوماسۍ له لارې سیمه کې سوله کېدلی شي.
ښاغلي اردوغان نن خبریالانو ته وویل، د لوېدیځ په تېره امریکا هڅې د اوکران جګړې ته اسانه حل لاره موندلی شي.
د ناټو غړې ترکیه د اوکراین د ځمکنۍ بشپړتیاملاتړ کوي او د روسیې برید غندي، خو د مسکو پرضد د غرب د بندیزونو مخالفه هم ده.
ترکیه د انرژۍ او سیلګرۍ په برخه کې له روسیې سره مهم اړیکي لري.
ترکیې تېر مارچ کې د اوکراین جګړې د ختمېدو لپاره د منځګړتوب وړاندیز وکړ.
رجب طیب اردوغان وايي پر نړۍ د دې جګړې اغېز باید کم کړل شي.
نوموړی وايي، د جکړې دواړه لوري یې بیا بیا د خبرو مېز ته سره کېنولي او دا کار بیا هم کولی شي.
د امریکا ټاکلي ولسمشر ډونالډ ټرمپ هم په ټاکنو کې ویل، که ولسمشر شي، نو ۲۴ ګړیو کې د اوکراین جنګ ختمولی شي.